14 февраля 2015 г.
Февралĕн 12-мĕшĕнче район администрацийĕн пуçлăхĕ М.Афанасьев Тукай Мишер ялĕнче пулчĕ. Унта вăл вырăнти мăсăльмансен общинин ĕçĕ-хĕлĕпе паллашрĕ. Тукай Мишер ялĕн хастар арĕсем Агзям Шакиров, Наиль Ямалутдинов тата Урмаел ял тăрăхĕн пуçлăхĕ Минзаид Зайнуллин Обществăлла совет пурнăçĕпе паллаштарчĕç. Хăнасем нумаях пулмасть хута янă медресере пулса курчĕç. Икĕ хутлă, 840 тăваткал метр лаптăклă медресе çуртне Тукай Мишер ял халăхĕ тăрăшнипе 2,5 çул хушшинче хăпартса хута янă. Кунта ислам тĕнне тата Корана пăхмасăр вĕренмелли классем, кĕлĕ вуламалли, апат çимелли тата пурăнмалли пỹлĕмсем пур. Çак проекта пурнăçа кĕртнĕ чух Чăваш Енри мăсăльмансен тĕн управленийĕ ыйтнипе Тутар республикин ертỹлĕхĕ те хутшăннă.
Медресе çумĕнче вĕрентекенсен тата попечительсен канашĕсем ĕçлеççĕ. Вĕренỹ процесне ертсе пыма Тукай Мишер ял çыннине, Чăваш Ен тĕн управленийĕн муфтийĕн çумне, "Гулистан" медресе экс-ректорне Наиль Хазрат Ямалутдинова шаннă. Çак медресе яла илем кỹрекен тата Чăваш Енри ислам тĕн вĕрентĕвне пурнăçламалли вырăн пулнине уйрăм каласа хăварас килет.
Источник: "Каçал Ен"