05 февраля 2014 г.
Унччентерех районти чылай колхозра сурăх ферми пурччĕ. Çемçе çăмĕшĕн, тутлă какайĕшĕн, паха тирĕшĕн усранă çак выльăха. Çăм хакĕ чакса ларнă хыççăн ăна туянакан çукпа пĕрех темелле (кăçатă çапакансем çеç сезон вăхăтĕнче шыраççĕ), çавăнпа ку отрасль тăкаклă пулса тăчĕ, хуçалăхсем сурăх тытма пачах пăрахрĕç. Ял çыннисен килĕсенче те питĕ сахал вĕсем.
Паянхи кунччен районти пĕр хуçалăхра çеç — «Дубовка» тулли мар яваплă организацире — пулнă çак выльăхсем. Сурăх какайне туянас кăмăллисем вара районта яланах пулнă, хуласенчен те килсе шыракансем пур. Çакна шута илсе ĕнтĕ Тукай Мишерĕнчи Ибрагимовсем фермер хуçалăхĕ уçма, унта сурăх ферми туса хума шут тытнă. Хăйсен шухăшĕсене хут çине куçарса бизнес-план çырнă, патшалăхран пулăшу ыйтнă. Çак ĕçре вĕсене район администрацийĕн ял хуçалăх пайĕн специалисчĕсем сĕнÿ-канашпа чылай пулăшнă. Пĕрле тăрăшни харама кайман, Гелия Рафиковна Ибрагимовăна çĕнĕ ĕç пуçарса яма «Начинающий фермер» проектпа Россия Федерацийĕн тата Чăваш Республикин бюджечĕсенчен 900 пин тенкĕлĕх грант парса пулăшнă.
Январĕн 31-мĕшĕнче Ибрагимовсен фермер хуçалăхĕнче сурăх фермине савăнăçлă лару-тăрура уçрĕç. Унта район администрацийĕн пуçлăхĕ Михаил Афанасьев, Чăваш Республикин Патшалăх Канашĕн Председателĕ Юрий Попов тата Петр Красновпа Кияметдин Мифтахутдинов депутатсем хутшăнчĕç. Гелия Ибрагимова хăнасене пысăках мар хуçалăхĕпе паллаштарчĕ. Ăна туса хута яма 5 млн тенке яхăн тăкакланă. Патшалăх панă грантсăр пуçне Чăваш Ял хуçалăх банкĕ 1 млн та 900 пин тенкĕлĕх çăмăллатнă кредитпа тивĕçтернĕ, хăйсен укçи-тенкине те хывнă паллах. Паянхи куна кунта «романовский» ăратлă 50 сурăх пур, хăшĕ-пĕрисем пăранлама та ĕлкĕрнĕ ĕнтĕ. Кĕтĕве 150—200 пуçа çитерме палăртаççĕ Ибрагимовсем. Сурăх ашне малтанласа ял, район çыннисене сутма, кайран вырнаçтармалли ытти каналсем тупма палăртаççĕ. Вĕсен ĕç-хĕлне, малашлăх планĕсене республика тата район ертÿлĕхĕ, районти ял хуçалăх предприятийĕсен председателĕсем ырларĕç, ăнăçу сунчĕç. Туянакансем пулаççех ĕнтĕ, мĕншĕн тесен шашлăк-хашлама çиме пурте юрататпăр-çке, сурăхне вара килте кашниех тытаймасть. Çавăнпа та çак фермер хуçалăхĕ аталанса каясси пирки иккĕленме сăлтав çук.
2013 çулта «Начинающий фермер» программăпа районти 4 уйрăм хушма хуçалăх патшалăхран пулăшу илнĕ. Вĕсем: Павлов Василий (Çĕнĕ Мăрат), Соловьева Татьяна (Тукай), Ибрагимова Гелия (Тукай Мишер) тата Миназетдинов Хайдар (Урмаел). Вĕсене панă грантăн пĕтĕмĕшле хисепĕ 4 миллион тенкĕпе танлашнă.
Л.ШУРЯШКИНА
Источник: "Каçал Ен"