26 марта 2008 г.
Çĕнĕ Мăратра çуралса ỹснĕ, Чечен вăрçинче пуçне хунă ентеше Л.Борисова асра тытса çулсерен волейбол турнирĕ йĕркелеççĕ. Кăçал ăна мартăн 2-мĕшĕнче ирттерчĕç. Ăмăртăва пилĕк команда хутшăнчĕ. Вăйăра Çĕнĕ Мăрат вăтам шкулĕн ачисене çитекенни пулмарĕ. Вĕсем пурне те парăнтарчĕç. С.Иванов, И.Шельтямов, Ю.Прокопьев, С.Наумов, В.Наумов, Н.Басников вăйăсенче маттур вылярĕç. Иккĕмĕш вырăнта - Шурут ялĕн спортсменĕсем. Çĕнĕ Мăрат студенчĕсем - виççĕмĕшсем. Çĕнтерỹçĕсене грамотăсемпе, парнесемпе чысларĕç. "Рассвет" (М.Р.Афанасьев) ял хуçалăх кооперативĕсене, "Çĕнĕ Мăратри йывăçран япала тăвакан комбинат" акционер обществи тата "Солнышко" лавкка (М.А.Киргизов) ăмăртăва йĕркелеме пулăшнă. Уйрăмах вара "Заря" ял хуçалăх кооперативĕн ертỹçине А.Н.Павлова тав тăвас килет, вăл тăтăшах тĕрлĕ мероприяти ирттерме пулăшать. Акă, нумаях пулмасть шкула волейбол мечĕкĕсем парнелерĕ. Тăван шкула манманшăн тавах.
Источник: "Каçал Ен"