07 ноября 2015 г.
Районти "Кĕтне" физкультурăпа спорт комплексĕ спортпа туслисене тĕрлĕ ăмăртусене час-часах пуçтарать. Акă, ноябрĕн 4-мĕшĕнче, Халăх пĕрлĕхĕн кунĕнче, спорт комплексĕнче йăлана кĕнĕ "Атте, анне, эпĕ - спорт çемйи" районти 2-мĕш фестиваль иртрĕ. Шел пулин те, кăçал унта 3 çемье çеç хутшăнчĕ. Ыттисем ăçта-ши? Спорта кăмăлламаççĕ-шим?
Спортпа туслă пурăнакан, ачисене мĕн пĕчĕкренех сывă пурнăç йĕркине хăнăхтаракан, вĕсемшĕн тĕслĕх пулса тăракан çемьесем Шемекеевсем (Комсомольски), Плешковсем (Анат Тимĕрчкасси) тата Соколовсем (Кĕçĕн Каçал) пулчĕç.
Чи малтанах çемьесем хăйсемпе паллаштарчĕç, команда девизне тата ятне палăртрĕç. Спорт уявĕн чăн-чăн парни Клепа ятлă клоун пулчĕ. Вăл ушкăнсене зарядка тутарттарчĕ, хăйĕн хаваслă кăмăлĕпе спорт уявне илем кỹчĕ.
Зарядка хыççăн хĕрỹ тупăшу пуçланчĕ. Мĕнле кăна вăй виçмерĕç пулĕ çемьесем? Ашшĕсем ура хушшине мечĕк хурса чупрĕç, амăшĕсем скакалкăпа сикрĕç, ачасем баскетбол мечĕкĕпе ăмăртрĕç. Ачасем ашшĕ-амăшĕ йăтса тăракан обруч витĕр çĕлен евĕр авкаланса тухса финиша маларах çитес тесе тупăшрĕç. Тепĕр ăмăрту тата та интереслĕ пулчĕ - кашниех "шурлăха" кĕрсе ỹкес мар тесе обручсем çине пусса ăмăртрĕ. Кунта вара Шемекеевсене çитекен пулмарĕ. Баскетбол карçинккине тĕл перессипе Плешковсен хĕрĕ маттур пулчĕ. Тĕрлĕ тĕслĕ шарсене ларса шăтарас ăмăртăва та команда ертỹçисем - ачасем - хаваспах хутшăнчĕç.
Ăмăртусен пĕтĕмлетĕвĕпе Анат Ти-мĕрчкассинчи Плешковсен çемйине çитекенни пулмарĕ. Вĕсем фестивалĕн тĕп парнине - кубока тивĕçрĕç. Валерий Плешков, Аслă Чурачăк вăтам шкулĕнче физкультура предметне ертсе пыраканскер, хăйсен ачисене те мĕн пĕчĕкренех сывă пурнăç йĕркине çирĕп тытса пыма хăнăхтарни вара уйрăмах савăнтарать.
Спорт фестивалĕнче Шемекеевсен çемйи иккĕмĕш вырăна çĕнсе илчĕ, Соколовсем - виççĕмĕшсем.
Район администрацийĕн спортпа çамрăксен политикин секторĕн ертỹçи Юрий Боровков капитансене фестиваль пирки аса илтерекен вымпелсемпе саламларĕ.
Кăçал тата çитес çул иртекен ăмăртусене вара çемьесем ытларах хутшăнасса шанас килет. Спортпа туслă çемьере çеç сывă ачасем çитĕнеççĕ.
Н.АРХИПОВА
Источник: "Каçал Ен"