08 августа 2015 г.
Августăн 5-мĕшĕнче район администрацийĕн пуçлăхĕ Алексей Самаркин "Луч", "Заря", "Пайгас" ял хуçалăх кооперативĕсенче пулчĕ. Вăл вырма ĕçĕсем мĕнле пынипе, хуçалăхсенчи техника çителĕклĕхĕпе, предприяти ĕçченĕсене ĕç укçи тỹлессипе кăсăкланчĕ.
Хальхи вăхăтра пĕтĕм ял хуçалăх предприятийĕсемпе фермер хуçалăхĕсенче вырман хĕрỹ тапхăрĕ пырать. Паянхи куна 16184 гектартан 4 пин гектарне çапнă, 840 тонна тĕшĕленĕ. Гектарăн вăтам тухăçĕ 20 центнерпа танлашать. Пĕрчĕллĕ тырăсен чи пысăк тухăçĕ - Хайртдинов фермер хуçалăхĕнче (28,2 центнер), "Урожай" колхозра пĕр гектар пуçне 24,8 центнер, "Восток" ЯХПК-ра 24,2 центнер çапса тĕшĕлеççĕ. Выльăх-чĕрлĕх апачĕ хатĕрлессине илсен, районĕпе 8 пин тонна ытла утă, 24 пин тонна сенаж янтăланă. Ял ĕçченĕсем кĕрхи тырă акма çĕр хатĕрлесси, çĕртме тăвасси çинчен те манмаççĕ.
"Луч" ЯХПК-ра 200 гектар çинчи кĕрхи тулла пухса кĕртнĕ, вăтам тухăç 19 центнерпа танлашать. 15 гектар çĕртме тунă, 100 гектар çĕре кĕрхи тырă акма хатĕрленĕ. Хуçалăхра 40 тонна утă, 545 тонна сенаж, 1500 тонна силос янтăланă.
"Луч" кооперативра 350 пуç мăйракаллă шултра выльăх тытаççĕ. Вĕсенчен 140 пуçĕ - сăвакан ĕнесем. Пĕр литр сĕт (1 сорт) хакĕ 13 тенкĕрен 14 тенке çитни сăвакан ĕнесен шутне ỹстерме хавхалантарать. 2014 çулта пăру витисене 2 млн тенкĕлĕх çĕнетнĕ. Хуçалăх ертỹçи Н.Иванов каланă тăрăх, планра - выльăх-чĕрлĕх шутне ỹстересси, техникăна çĕнетесси, апат валеçекен агрегат туянасси. Тĕп задача - предприяти ĕçченĕсене тивĕçлĕ ĕç укçи тỹлесси.
Алексей Самаркин "Заря" ял хуçалăх кооперативĕн ертỹçипе В.Макаровпа та тĕл пулса калаçрĕ. "Заря" ЯХПК ĕçченĕсем паянхи куна 90 гектар çинчи тырра çапса илнĕ. Унăн тухăçĕ пĕр гектартан 13,3 центнер çеç. Çакă Çĕнĕ Мăратсене пысăк пахалăхлă вăрлăхпа ĕçлеме хистемеллех. 280 тонна утă кĕртнĕ, ку планпа палăртнин 167 проценчĕпе танлашать. 450 тонна сенаж хывнă. Кĕрхи тырă акма 60 гектар çĕр хатĕрленĕ.
Райадминистраци пуçлăхĕ "Пайгас" ял хуçалăх кооперативĕнче те пулчĕ. Вăл кунти ĕçченсемпе ĕç укçи пирки калаçрĕ.
Алексей Самаркин вырма ĕçĕсене яланах тĕрĕслесе, тимлĕх уйăрса тăрать.
Источник: "Каçал Ен"