18 июля 2015 г.
Питравра Анат тата Тури Тимĕрчкасси ялĕсенче пурăнакансем ял уявне паллă тăвассине йăлана кĕртнĕ. Çак кун ял çыннисем вăййа тухнă, юрă шăрантарнă, ташласа савăннă. Кăçал та Питрав кунĕ çỹллĕ шайра иртнĕ.
Пухăннисене Тукай ял тăрăхĕн пуçлăхĕ Ольга Андреева, "Кĕтне" ентешлĕх ертỹçи Александр Капитонов, "Чувашсетьгаз" АУО генеральнăй директорĕ, ЧР Патшалăх Канашĕн депутачĕ Кияметдин Мифтахутдинов, "Луч" ЯХПК председателĕ Николай Иванов уявпа саламланă.
Тукай ял тăрăхĕн "Шурăмпуç" ансамблĕ, Анат Тимĕрчкасси культура çурчĕн фольклор ушкăнĕ кăмăла çĕклекен юрăсем шăрантарнă, ташша тухма чĕннĕ.
Уява килнисем вырăнти ал ĕç ăстисен ĕçĕсемпе паллашнă, тутлă шỹрпепе хăналаннă.
Сывă пурнăç йĕркине пăхăнакансем футболла, канат туртса, кĕрешсе тупăшнă. Ăмăртусенче чи çивĕччисем çĕнтернĕ.
Уяв программине хуларан килсе çитнĕ юрăçсем савăнăçлă концертпа вĕçленĕ. Ял çыннисем дискотекăра савăннă, фейерверкпа киленнĕ.
Источник: "Каçал Ен"