27 июня 2015 г.
Нумаях пулмасть Чĕмпĕрти ипподромра тата Çĕнтерỹ паркĕнче Акатуй иртнĕ. Çак уява Чĕмпĕр облаçĕнчен çеç мар, кỹршĕллĕ ытти регионсенче пурăнакан чăвашсем те хутшăннă. Куракансене Оренбург, Саратов, Самара облаçĕсенчен, Пушкăрт, Тутарстан тата Чăваш Республикисенчен килсе çитнĕ 30 яхăн пултарулăх коллективĕ хăйсен çулăмлă ташшисемпе, çепĕç юррисемпе савăнтарнă, хавхалантарнă.
"Акатуя" Чĕмпĕрте уявласси йăлана кĕнĕ. Чĕмпĕр облаçĕн кĕпĕрнатăрĕ Сергей Морозов кунта уяв 26-мĕш хутчен, регионти 17 районта иртнине палăртса хăварнă.
- "Акатуя" ирттерни пирĕн тăрăхра пурăнакан 120 тĕрлĕ халăхра хăйĕн нацисемпе мăнаçланас, культурăпа йăла-йĕркесене хисеплес кăмăл-туйăм çуратать. Чĕмпĕр облаçĕнче 400 шкултан 90-шĕнче чăваш чĕлхипе культурине вĕрентеççĕ. 2,5 пине яхăн шкул ачи, 80 учитель пулăшнипе, хăйĕн халăхĕн мĕн авалтан килекен историне пĕлет. Чăваш халăхĕнчен тухнă 7 ентеш Совет Союзĕн Геройĕн ятне тивĕçнĕ. Вĕсенчен пĕри вара - пĕтĕм Мухтав орденĕн кавалерĕ. Паянхи куна чăваш халăхĕ наука, культура, политика, ял хуçалăх тата та ытти тĕрлĕ-тĕрлĕ сферăра хăйне кăтартать, пирĕн çĕршывшăн чунне парса тăрăшать. Чĕмпĕр облаçĕнче 110 пин ытла чăваш пурăнать. Ку вара темрен те паха! - мăнаçлăн пĕлтернĕ кĕпĕрнатăр хăйĕн сăмахĕнче.
Çак чаплăран та чаплă уява пирĕн ентешсем те, Тукай ял поселенийĕн "Шурăмпуç" халăх фольклор ансамблĕ, хутшăннă. Вĕсем уявăн икĕ площадкинче те хăйсен пултарулăхĕпе паллаштарнă, кăмăла уçакан юрăсем шăрантарса, илемлĕ ташăсем ташласа куракансене савăнтарнă.
Н.АРХИПОВА
Источник: "Каçал Ен"