11 июня 2015 г.
Май уйăхĕн юлашки кунĕсенче пĕтĕм чăваш халăхĕ К.В.Иванов паллă поэт çуралнăранпа 125 çул çитнине паллă турĕ. Юбилей мероприятийĕсем Пушкăрт республикинчи вăл çуралса ỹснĕ Слакпуç ялĕнче те иртнĕ. Унта Чăваш Республикинчен Министрсен Кабинечĕн Председателĕн çумĕ - информаци политикин министрĕ Александр Иванов ертсе пынă пысăк делегаци те хутшăннă. Константин Ивановăн тăван тăрăхĕнче хăнасене çăкăр-тăварпа, пушкăрт кăмăсĕпе, чăваш чăкăчĕпе тата савăк кăмăлпа, ташă-юрăпа кĕтсе илнĕ.
Чăваш наци конгресĕ пуçарнипе чăваш литературин классикĕн К.В.Ивановăн тата Раççей Федерацийĕнчи Литература çулталăкĕсене халалланă Пĕтĕм Раççейри "Аслă Силпи ялĕнче" халăх пултарулăхĕн фестивалĕ пулнă. Слакпуçĕнчи культура çурчĕ умĕнче Пушкăртстан Республикинчи, Чăваш Енри, Тутарстанри, Челябинск, Оренбург, Ульяновск облаçĕсенчи чăваш фольклор коллективĕсем хăйсен пултарулăхне кăтартнă. Вĕсем хушшинче пирĕн ентешсем те, Тукай ял поселенийĕнчи "Шурăмпуç" халăх фольклор ансамблĕ, пулнă.
Тепĕр кун ушкăн членĕсем чаплă сăвăçăн вилтăпри çине тата унăн палăкĕ умне чĕрĕ чечексем хунă. Вĕсем Константин Ивановпа Яков Ухсай музейĕнче те пулнă, "Нарспи" çăлкуç умĕнчи литературăпа музыка композицине курса киленнĕ. Поэмăн тĕп геройĕсем Нарспипе Сетнер шăп ун умĕнче каçсерен тĕл пулнă-çке.
Çак пысăк та чаплă уяв "Шурăмпуç" ансамбле çỹрекенсен чунĕсенче, асĕнче яланлăхах юлĕ.
Источник: "Каçал Ен"