10 сентября 2014 г.
Чăваш Республикин Шалти ĕçсен министерствинче çулталăк каялла Çурçĕр Кавказра командировкăра вилнĕ Александр Егоровпа Леонид Пучков полицейскисен наградисене нумаях пулмасть вĕсен çемйисене панă. Полици аслă сержанчĕсен пурнăçĕ 2013 çулхи августăн 16-мĕшĕнче татăлнă. Чечня Шалти ĕçсен министерствин Сунжен районĕнчи территорине кĕмĕ хăтланнă террористăн çăмăл автомашинине çулне пỹлнĕ чухне взрыв кĕрленĕ: 9 çын аманнă, 3-ĕн вилнĕ. Вилнисенчен иккĕшĕ шăпах пирĕн ентешсем пулнă. Александр Егоровпа Леонид Пучков ячĕсене Чăваш Республикинчи Шалти ĕçсен министерствин йĕрке хуралçисен списокне ĕмĕрлĕхех кĕртнĕ. Вĕсен хушамачĕсене Шупашкарти "Çĕнтерỹ" мемориал комплексĕнчи хĕрỹ вырăнсенче пуç хунă паттăрсене сума суса лартнă палăк çинче ылтăн сас паллисемпе çырнă. Патшалăх наградисене Александрпа Леонид амăшĕсене Нина Николаевнăпа Галина Александровнăна ЧР шалти ĕçсен министрĕ Сергей Семенов генерал-майор панă.
Çурçĕр Кавказра пулнă ентешсене тăван тăрăхра та манмаççĕ. Сăмахран, Анат Тимĕрчкасси тĕп шкулĕнчи пионер дружини Александр Егоров ячĕпе хисепленсе тăрать. Çавăн пекех Саша пуçне хунăранпа çур çул çитнĕ кун футбол турнирĕ йĕркеленĕ. Ун чухне турнира тăватă команда хутшăннăччĕ. Куçса çỹрекен кубока Сашăн ĕçтешĕсен команди çĕнсе илнĕ. Кăçал сентябрĕн 16-мĕшĕнче ентеш çуралса ỹснĕ ялта, Анат Тимĕрчкассинче, вăл пурăннă çуртра тата тĕп шкулта Асăну хăмисене вырнаçтарма палăртнă. Çавăн пекех мини-футбол турнирне те йĕркелеççĕ. Унта районти хастар спортсменсене хутшăнма чĕнетпĕр.
Источник: "Каçал Ен"