26 июля 2014 г.
Тукай ялĕнчи Нина Михайловнăпа Анатолий Архипович Соловьевсен çемйинче 1959 çулхи июлĕн 16-мĕшĕнче хĕр çу-ралнă, ăна Зинаида ят панă. Çемьере вĕсем пилĕк пĕр тăван ỹснĕ - пĕр хĕр тата тăватă ывăл. Тукай тулли мар вăтам шкулĕнче Зина 8 класс вĕренсе пĕтернĕ, 9-мĕшпе 10-мĕш классене Тăманлă Выçли шкулне çỹренĕ. Мĕн пĕчĕкренех вĕсем колхоза, ашшĕ-амăшне пулăшнă, комбикорм цехĕнче тăрăшнă, çуллахи каникулта Тутарстан Республикине ĕне сума кайнă, Мускав облаçĕнче те йĕтĕн çыхнă. Çамрăк чухне юрă-ташăпа туслă пулнă Зинаида Анатольевна, ялти фольклор ушкăнне юрлама çỹренĕ. Час-часах тĕрлĕ концертра юрă-кĕвĕ шăрантарнă çамрăксем. Вĕсен концерчĕсĕр ялти пĕр уяв та иртмен.
1981 çулта хĕр Аслă Чурачăк каччипе Василий Александрович Тарасовпа çемье çавăрать. Мăшăрĕ районти сельхозтехникăра водительте ĕçленĕ. Зинаида Анатольевна яла куçса килсенех пĕр çул "Эмитрон" заводăн Комсомольскинчи филиалĕнче тĕрлĕ ĕç пурнăçлакан рабочи пулнă. 1982 çулта вара "Заветы Ильича" колхозăн сĕт-çу фермине вырнаçнă, унтанпа 32 çул ĕнтĕ дояркăра тăрăшать. Пĕрре мар хастар ĕçчене Хисеп грамотипе, Тав хучĕпе чысланă.
Василий Александровичпа вĕсем 3 ача çитĕнтернĕ - икĕ ывăл та пĕр хĕр. Халĕ вĕсен 4 мăнук. Ĕмĕрĕпе мăшăрĕн ашшĕ-амăшĕпе пĕр килте пурăннă. Ваттисем вĕсене яланах лайăха çеç вĕрентнĕ, мĕн пĕлменнине пурнăçлама пулăшнă. Зинаида Анатольевнăпа Василий Александрович пĕр-пĕрне хисеплесе, юратса пурăнаççĕ, ачисемшĕн, мăнукĕсемшĕн тăрăшаççĕ, вĕсене ура çине тăратма ĕмĕтленеççĕ.
Зинаида Анатольевна чечексем çитĕнтерме кăмăллать. Çапах та юратнă ĕçĕ унăн - ĕне сăвасси. Ачаран килĕшнĕ ĕçе вăл паян кун та чунтан савса пурнăçлать. Пенси çулне çитнĕ пулсан та килте ларасшăн мар, малашне те фермăрах тăрăшасшăн. Халĕ вăл 60 ĕне сăвать, кашнинчен талăкра вăтамран 17-шер килограмм сĕт суса илет.
Нумаях пулмасть Зинаида Анатольевна 55 çул тултарнă ятпа Тарасовсен килĕнче юбилей иртрĕ. Саламлама пур тăванĕпе тус-хурăнташĕ пуçтарăнчĕ. Тав сăмахĕ калама "Труд" ЯХПК председателĕпе Ремис Шарафутдиновпа ферма заведующийĕ Миннадий Хуснутдинов çитрĕç. Ăшă сăмахсем каласа парне пачĕç, малашне те çапла хастар пулса ĕçлеме сунчĕç.
Ĕçчен те пултаруллă Зинаида Анатольевнăна малашне те сывлăхлă, вашават пулма, пурнăçа юратса пурăнма сунас килет.
Источник: "Каçал Ен"