15 октября 2008 г.
Октябрĕн 11-мĕшĕнче Шупашкарти «Спартак» стадионта «Советская Чувашия» хаçат парнисене çĕнсе илессишĕн эстафетăлла чупусем иртнĕ. Çав кун çемьесемпе спорт ветеранĕсем, массăллă информаци хатĕрĕсен, предприятисемпе организацисен, патшалăх влаçĕн тата вырăнти самоуправлени органĕсен ĕçченĕсем, шкул ачисемпе сту-дентсем, профтехучилищĕсенче тата ятарлă вăтам пĕлÿ паракан заведенисенче вĕренекенсем старта тухнă. Эстафета çĕнтерÿçисене кубоксемпе, медальсемпе, дипломсемпе тата хаклă парнесемпе чысланă. Анат Тимĕрчкасси шкулĕн команди те — çĕнтерÿçĕсен шутĕнче. Тĕп шкулсем хушшинче пирĕн çамрăк спортсменсем финиша чи малтан çитнĕ. Чăннипех те маттур çак шкулта вĕренекенсем. Вĕсене черетлĕ çĕнтерÿпе саламлатпăр, малашне те çитĕнÿ хыççăн çитĕнÿ тума сунатпăр.
Источник: "Каçал Ен"