22 марта 2008 г.
Хырхĕрри тĕп шкулĕнче вĕренекенсем хĕллехи спорт сезонне вĕçлесе ăмăрту ирттерчĕç. Старта тухакансем ку хутĕнче пĕр ялта пурăнакансемпе командăсене пайланчĕç. Ушкăнри 3 хĕрачапа 3 арçын ача шутĕнче, паллах, чи пултаруллисем çеç пулчĕç. Спортсменсене дистанцие вĕçлеме çăмăлах пулмарĕ. Çуркунне çывхарни тавралăхра аванах сисĕнет: юр самаях пусăрăнчĕ, шывланчĕ. Çавна пула йĕлтĕр юрласа шуса пырасшăнах мар çав. Спорт тусĕсем йывăрлăхсенчен хăраса тăмарĕç. Хырхĕрри, Кĕтне Пасар, Хурнай, Вăрманхĕрри Чурачăк ачисем мала тухма тăрăшрĕç. Ăмăртакансем хушшинче 8-мĕш класра вĕренекен Юля Ершовăпа Сергей Пожеданова хăваласа çитекен пулмарĕ. Командăсенчен хурнайсем çĕнтерỹçĕ ятне илчĕç. Çак ушкăнра Костя Минин, Дима Никонов, Мария Федорова, Мария Минина, Юля Ершова - спортăн чи çывăх тусĕсем. Çамрăк йĕлтĕрçĕсене юлташĕсемпе класс ертỹçисем хавхалантарни те пысăк пĕлтерĕшлĕ пулчĕ.
Источник: "Каçал Ен"