27 февраля 2008 г.
Пăшалтан тĕл перекенсен районти ăмăртăвĕ виççĕмĕш çул Хырхĕрри тĕп шкулĕнче нарăс уйăхĕнче иртет. Ку хутĕнче те хăнасене лайăх кĕтсе илме хатĕрленни уççăнах курăнать. Тем пысăкăш спортзалра ăмăртăва хутшăнакансемпе пĕрлех "чирлекенсем" те чылай пуçтарăннă. Хырхĕррисем ăмăртăва тĕплĕн хатĕрленнĕ. Ара, хуçисене тăван шкул стенисем те пулăшаççĕ-тĕр. Ахальтен мар чи лайăх перекенсем кунтан пулнине курса çирĕплетме май пулчĕ. Тĕп шкулсенчен çĕнтерỹçĕ пулса тăма команда членĕсене ăсталăхĕпе куç çивĕчлĕхĕ пулăшрĕ. Пурĕ 50 очко пуçтармалла пулнă пулсан арçын ачасенчен С.Пожеданов (8 кл.) 44, А.Школьников (7 кл.) 43, М.Топтыгин (8 кл.) 41 очко пуçтарчĕç. Хĕр ачасенчен А.Хлебникова (5 кл.) 44, М.Федорова (8 кл.) 42 очколлă пулса тăчĕç. Физкультура учителĕ Н.Ятманов ертсе пынипе çак ачасем кашни кунах пăшалтан пеме хăнăхнă. Тăрăшнин пĕтĕмлетĕвĕ - куç умĕнчех. Район чемпионĕсене ăшшăн саламларĕç. Александровка тĕп шкулĕн вĕренекенĕ Н.Антонова 35 очко пуçтарса 3-мĕш вырăна тухма пултарчĕ. Тĕп шкулсенчен Урмаел тата Чĕчкен командисем - иккĕмĕшпе виççĕмĕш вырăн хуçисем. Вăтам шкулсен командисенчен арçын ачасен ушкă-нĕнче 1-мĕш вырăнта - В.Ложков (Шурут). Унăн пурĕ 38 очко. Унран 1 очко каярах В.Земсков (Аслă Чурачăк) пырать. 3-мĕш вырăна 35 очкопа А.Николаев (Нĕркеç) тухрĕ. Хĕрачасем вырăнсене çапла пайларĕç: М.Белкован (Комсомольски 2-мĕш вăтам шкулĕ) 39 очко, Н.Костякован (Хырай Ĕнел) - 33 очко, С.Краснован (Тăманлă Выçли) - 30 очко. Ăмăртăва предприятисемпе учрежденисен ĕçченĕсем те хутшăнчĕç. Уйрăмах учительсем хастар пулчĕç. 1-мĕш вырăнта - Хырхĕрри тĕп шкулĕн коллективĕ, 2-мĕш вырăнта - Хырхĕрри ял поселенийĕ, 3-мĕш вырăнта - Аслă Чурачăк вăтам шкулĕн коллективĕ. Хĕрсемпе хĕрарăмсен ушкăнĕнче Е.Топтыгина (Хырхĕрри ял поселенийĕ ) - 42 очкопа, Г.Белкова (Хырхĕрри тĕп шкулĕ) - 39 очкопа, Г.Давыдова (Хирти Явăш вăтам шкулĕ) 19 очкопа палăрчĕç. Арçынсенчен Н.Ятманов (Хырхĕрри тĕп шкулĕ) - 29 очко, В.Гаврилов (Шурут) - 29 очко, Ю.Москвин 29 очко пуçтарса малтисен шутне кĕчĕç. Ку ăмăртăва çулсерен Çĕршыв хỹтĕлевçисен кунне халалласа ирттереççĕ. Апла пулсан пирĕн çамрăк ăру пулас маттур салтаксем тесе калас килет манăн.
Источник: "Каçал Ен"