10 ноября 2007 г.
Ялти культура çурчĕсем çу-мĕнчи ача-пăча драмкружокĕсен смотр-конкурсĕ пуçланчĕ. Асанкасси, Хырхĕрри ял поселенийĕсем ку енĕпе пĕрремĕш утăмсем турĕç те ĕнтĕ. Тăван ялта смотр-конкурсăн программине хырхĕррисем "Сывлăх урокĕнчен" пуçларĕç. Пуçламăш классенче вĕренекен Настя Горбунова, София Никонова, Артем Бормотин чĕрчунсен ролĕсене аван выляса сывлăха упрамалли, çирĕплетмелли мелсемпе паллаштарчĕç. Сцена çинчи ăсталăха алла илме вĕсене Р.Морозова, Т.Бормотина хăнăхтарнă. Вăрманхĕрри Чурачăк ялĕнчен килнĕ 3-мĕш класс ачисем Юхма Мишшин "Светофорпа Москвич" пьесине кăтартса пачĕç. Н.Вахитова учитель ертсе пынипе вĕсем çул çинчи хăрушсăрлăх правилисене еплерех пăхăнмаллине хăнăхтарчĕç. Таня Хлебникова, Владик Хлебников, Юлия Ятманова, Саша Корнилов, Женя Федоров, Таня Коновалова, Дима Можаев çамрăк артистсем залра ларакансене çул çинче асăрхануллă пулмалли çинчен питĕ курăмлăн аса илтерчĕç. Уйрăмах Светофор çутисем, вăл ăс парса калакан сăвă йĕркисем асра юлчĕç. Асанкасси ачисем те пултарулăхĕпе питĕ маттур пулчĕç. Настя Павлова (7 кл.), Катя Школьникова (8 кл.) Виталий Енĕшĕн "Пăкăварить" мыскарине чăн-чăн артистсенчен кая мар вылярĕç. Вырăсла та, чăвашла та лайăх пĕлмелле текен шухăш патне илсе пычĕ вĕсем кăтартса панă ĕç. Жюрин çăмăлах мар ĕçне район администрацийĕн культура пайĕн аслă специалисчĕ З.Мельникова, Комсомольскинчи культурăпа кану центрĕн методисчĕ В.Курицына пурнăçларĕç. Ĕçсене тишкерсе хак панă хыççăн виçĕ ушкăн та пултаруллă пулни палăрчĕ. Ял поселенийĕсем кустсенчи смотр-конкурссене вĕçлесен чи тивĕçлисем Комсомольскинчи культурăпа кану центрĕнче хăйсен пултарулăхĕпе паллаштарĕç. Культура çурчĕсем çу-мĕнче йĕркеленĕ драмкружоксем ачасен пултарулăхне, ăсталăхне аталантарас тĕлĕшпе чăннипех те пысăк ĕç тунине кăтартса парать çак смотр-конкурс.
Источник: "Каçал Ен"