08 сентября 2007 г.
Ял варринче кирпĕчрен купаланă икĕ хутлă илемлĕ çурт аякранах курăнса ларать. Ун патне тăсăлса выртакан асфальт çул тăрăх яланах çын утнине, ятарлă вырăна машинăсем çитсе чарăннине курма пулать. Кашнин хăйĕн ĕçĕ-хĕлĕ, тĕллевĕ-шухăшĕ. Пĕрисем васкаççĕ пулсан, теприсем вара вăрахчен чарăнса тăраççĕ, иккĕн-виççĕн пуçтарăнса тем канашлаççĕ е сỹтсе яваççĕ. Ку çурта килсе çỹремесĕр пурăнма май çук çав, мĕншĕн тесен "Восток" ял хуçалăх кооперативĕн правленийĕ те, тĕслĕх библиотека та, культура çурчĕ те, фельдшерпа акушер пункчĕ те кунтах вырнаçнă. Хырхĕрри çыхăну уйрăмĕн пуçлăхĕ Любовь Федоровна Ятманова та виçĕ çул каялла хăйсене çакăнтах вырăн уйăрса панишĕн савăнса пĕтереймест. Çутă та хăтлă, аслă та ирĕклĕ пỹлĕмре ĕçлеме питех те кăмăллă. Сивĕ хĕл те хăратмасть. - Унчченхи кивĕ йывăç çуртра чечексем шăнатчĕç. Хутса ăшăтса çитерме çукран вĕсене вилĕмрен çăлса юнашарти лавккана миçе хутчен кайса лартман-ши,- аса илет Любовь Федоровна. - Хама килĕшекен ĕçе пысăк пахалăхпа туса пыма газ кĕртни, компьютер кỹрсе килни питĕ пулăшать. Çыхăну уйрăмĕнчен çын татăлмасть. Тĕрлĕ ыйтупа килекенсемпе пуçлăх ăшшăн калаçать, мĕн кирлипе тивĕçтерет, тавар та сутма ĕлкĕрет. Уйрăм сентресем çинче куçа илĕртекен тĕрлĕ-тĕрлĕ открытка, сутмалли хаçат-журнал, сăнỹкерчĕк тумалли хатĕрсем курăнса выртаççĕ. Туянакана суйласа илме питех те ансат. - Ялсенче камăн юбилей е туй пуласса эпир малтанах пĕлсе интересленсе тăратпăр, çавăнпа саламлакансем валли сувенирлă открыткăсем хатĕрлесе хуратпăр, кил тăрăх çỹресе сĕнсе пăхатпăр, суйласа илме те пулăшатпăр,- ĕçĕнчи пĕчĕк вăрттăнлăхсемпе те паллаштарать Л.Ф.Ятманова. - Чăрмавсем те пулкалаççĕ. Ялсенче çынсем ытларах чăвашла вуласшăн, пире вара хакĕсем "çыртакан" вырăс хаçа-чĕсене уйрăммăн сутма параççĕ. Акă, анчахрах "Бурда" ятлă 2 журнал килсе çитрĕ, пĕриншĕн 75 тенкĕ кăларса хумалла. Çак кăларăмсене вырнаçтарасси пăшăрхантарать пире. Лотерея билечĕсем туянакансенчен ят та лекет. Вылявĕ ăнăçлă пулмасан килсе вăрçакан пур. Çапла пулин те, Любовь Федоровна хăйĕн ĕçĕнче пуринпе те пĕр чĕлхе тупма пултарать. Ырă кăмăллăскер, анлă тавракурăмлăскер, пăрчăкан пек вăр-варскер, пур ĕçе те вăхăтра тата тĕплĕн тума пултарать. Унăн ешерекен чечекĕсем çинчен куç каймасть. Ачана пăхнă пек юратма, тирпейлесе шăварса тăма вăй-хал çитерет çак маттур хĕрарăм. Л.Ф.Ятмановăна ĕçтешĕсем те питĕ хисеплеççĕ. Вăрманхĕрричурачăксен почтальонĕ Надежда Васильевна Корнилова 25 çул ытла ĕçлесе пуян опыт пухнă. Кам мĕнле хаçат-журнал кăмăлланине вăл тахçанах пĕлсе çитнĕ тесен те йăнăш пулмасть. Çакă вара ăна çырăнтару ĕçĕнче аванах пулăшу парать. Ватă çынсем те унпа питĕ кăмăллă: пенси укçине вăхăтра валеçет. Хурнай, Хырхĕрри, Кĕтне Пасар ялĕсенче пурăнакансем вара Любовь Николаевна Мининăна яланах тарават. Вăл çĕнĕ кăларăмсемпе, хыпарсемпе килессе кĕтсе тăраççĕ. Почта ĕçченĕсен ĕçĕ çав тери нумай енлĕ. Хăйсем тăрăшнипе вĕсен чыс-хисепĕ те пысăк. Хырхĕрри тăрăхĕнче мĕнле хаçата ытларах çырăнса илни те кăсăклантарчĕ мана. Эрнере икĕ хут тухакан "Каçал ене" 91 çемье алла тытни уйрăмах кăмăла çĕклерĕ. Танлаштарма: кỹршĕри Асанкассинче - 75, "Тантăшпа" вара шкул ачисемпе çармăксем туслах мар иккен: пурĕ те 14 экземпляр çеç килсе тăрать. "Самант" тата "Тетте" журналсен шучĕпе те мухтанма çук. Чăвашла тухакан хаçат-журнала чăваш çынни вуламасан, çав кăларăмсен кун-çулĕ татăлма пултарасси куçкĕрет. Почта ĕçченĕсем, журналистсем, корреспондентсем халăх хушшинче çырăнтарăва ăнăçлă ирттерес тесе чылай вăй хураççĕ. Пирĕн те, вулакансен, хамăр пултарнă таран пулăшасчĕ, пичет кăларăмĕсемсĕр тăрса юлас марччĕ тесе почтальонсемпе вăхăтра тĕл пуласчĕ.
Источник: "Каçал Ен"