29 августа 2007 г.
"Восток" ял хуçалăх кооперативĕ - районта ăнăçлă аталанса пыракан хуçалăхсенчен пĕри. Сĕт, мăйракаллă шултра выльăх, сысна ашĕ, тырă, çĕрулми, выльăх апачĕ хатĕрлес енĕпе тăрăшса ĕçлет. Унсăр пуçне хуçалăх шултра йышши сысна тата хура-ула ăратлă пăрусем ĕрчетессипе тимлет. Çĕнĕ сортсем туса, вĕсене аталантарассипе ятарлă программăпа тăрăшаççĕ. Паянхи кун кооперативра хĕрỹ вăхăт. Вырма вĕçленсе пырать, выльăх апачĕ хатĕрлеççĕ, кĕракине пикеннĕ... Кашниех хăйне шанса панă ĕçе тивĕçлипе пурнăçлать. Выльăх-чĕрлĕх чи тупăшлă отрасль шутланнăран, вĕсене валли çителĕклĕ апат хатĕрлеме тăрăшаççĕ. Паянхи куна ял хуçалăх кооперативĕ 450 тонна утă, 3620 тонна сенаж, 380 тонна силос ха-тĕрленĕ. 420 гектар çинчи улăма пуçтарнă. "Восток" ЯХПКра палăртнă ĕçсене вăхăтра вĕçлес тĕллевпе ĕçлеççĕ. Мăйракаллă шултра выльăх ỹстерсе реализацилесси те çỹллĕ шайра тăрать. Паянхи куна хуçалăхра 870 пуç мăйракаллă шултра выльăх. Вĕсенчен 220 пуç сăвакан ĕне шутланать. Пăру илесси те аван шайра. Сĕт сăвассипе те районта малта пыракан хуçалăхсен йышĕнче. Сына ферминче 800 яхăн пуç сысна. Вăтамран кашни амаран 14-15 çура илнĕ. Аш-какайне сутнин тупăшĕ те пур. Кунта Л.А.Морозова, Н.И.Михеева, Е.А.Хлебникова, Е.Н.Степанова тăрăшса ĕçлеççĕ. Сысна çурисемпе ял халăхне тивĕçтерессине те лайăх йĕркеленĕ. "Хуçалăхра вăй хура- кансене яланах пулăшма хатĕр",- тет хуçалăх ертỹçи В.Г.Михеев. "Восток" ял хуçалăх производство кооперативне чылай çул Валерий Геннадьевич ертсе пырать. Вăл производствăна аталантарас, выльăхсене ăнăçлă çитĕнтерсе продукцине сутас енĕпе тăрăшса ĕçлет.
Источник: "Каçал Ен"