Публикации » «Палан» пултарулăхĕпе савăнтарать

Хырхĕрри культура çурчĕ çумĕнчи хĕрсен юрă ушкăнĕ хăйсен коллективĕ валли шăпах «Палан» ята суйласа илнĕ. Вун пилĕк çул ытла ĕнтĕ «Палан» хăйĕн илемлĕ юрри-кĕввипе куракансене савăнтарать. Ялти культура çуртĕнче иртекен концертсенче те, район шайĕнчи Акатуй, «Вырăс хĕлне ăсатни» уявсенче те, Аслă Çĕнтерĕве халалланă пысăк концертсенче те — ялан тенĕ пекех «Палан» тĕрлĕ юрăсем шăрантарать. Мĕне тăрать ушкăн солисчĕсене итлесе киленни! «Турă пиллесе панă çак сассене!» — тенине час-часах илтме пулать куракансенчен Людмила Нямукова, Надежда Корнилова, Луиза Петрова, Светлана Смирнова юрăçсем пирки. Вера Горбунова, Татьяна Бормотина, Галина Шикова, Мария Малышева, Любовь Порфирьева, Анфиса Емельянова, Маргарита Белкова, Люция Хлебникова, Галина Петрова, Елена Степанова та кашни юррах чуна парса юрласа куракансен кăмăлне тивĕçтереççĕ. Хĕрсен ушкăнĕпе пĕрлех вĕсене халăх пултарулăх енĕпе ертсе пыракан Александр Порфирьев ырми-канми вăй хурать, репертуарне çĕнĕрен-çĕнĕ юрăсем кĕртсе пырать. Юрăсем ытларах чăвашсен авалхи фольклорĕпе çыхăннă. Елена Топтыгинапа Леида Макарова вара вырăс халăхĕн юррисене икĕ сасăпа чуна пырса тивмелле шăрантарса тыткăнлаççĕ.

Иртнĕ кунсенче «Палан» Çĕнĕ Мăратра иртнĕ авалхи юрăсен фестивальне хутшăнчĕ. Лайăххисен шутне кĕрсе республика комиссийĕ умĕнче те хăйсен пултарулăхне кăтартас чыса тивĕçрĕ. Чăн та, ушкăна çÿрекенсем юрланипе çеç çырлахмаççĕ. Хăйсен вăйне, укçи-тенкипе вăхăтне шеллемесĕр сцена валли çи-пуç хатĕрлеççĕ. Нумаях пулмасть пир-пусма, тĕрлĕ тĕслĕ çипсем туянса анатри чăвашсен тум-тирне çĕлетнĕ. Çакна валли ятарласа ялти хĕрарăмсенчен улача пир пуçтарнă. Кĕписене вара Вăрманхĕрри Чурачăкра пурăнакан Раиса Лепешкина питех те çыпăçуллă çĕлесе пама пултарнă. Сăмах май, Раиса Трифоновна хăйĕн хĕрĕсемпе кинĕсем валли те анатри чăваш хĕрарăмĕн кĕпи-тумтирĕпе хушпăвĕсене хатĕрлесе-илемлетсе тунă. Хĕрсен ушкăнĕ юрăсене хуткупăс-баян тата ытти кĕвĕ хатĕрĕсем каласа янратать. Авалхи параппан тата шакмак, çатăрка, шакăртма, тинкелтин хăй тĕллĕн калакан кĕвĕ хатĕрĕсене Хырхĕрри тĕп шкулĕнчи физика вĕрентекенĕ Г.Н.Петров ăсталанă.

Сцена çинче юрланисĕр пуçне «Палан» хĕрĕсем ялти юбилярсене çуралнă кун ячĕпе, туйсенче çамрăк мăшăрсене, нумай çул пĕрле пурăнса «ылтăн туй» паллă тăвакансене килĕсене пырса саламлаççĕ. Тайма пуç сире, ялти пултаруллă артистсем. Чăн та, вăрманти палан тавралăха илем кÿнĕ пекех, «Палан» ушкăн та çынсене хăйĕн пултарулăхĕпе савăнтарать.