Публикации » Сцена çинче - хамăр ялсем

Пирĕн Комсомольски районĕнче «Яланах — театр» ятпа драма кружокĕсен смотр-конкурсĕ пырать. Çак тупăшăва Вăрманхĕрри Чурачăк клубĕ çумĕнчи Е.Степанова ертсе пыракан драма кружокĕ те хăпартлансах хатĕрленчĕ. Курава Альбина Сухан драматургăн «Пулă пуçĕнчен çĕрет» пьесине хатĕрлерĕç. Чи пирвайхи курава Хырхĕрри культура çуртĕнче лартма шутларĕç. Палăртнă вăхăта халăх та пуçтарăнчĕ, районти ятарлă комисси членĕсем те килсе çитрĕç.

Шăппăн та пĕр тикĕссĕн чаршав икĕ еннелле уçăлчĕ. Сцена çинче пысăк пуçлăхăн пÿлĕмĕ, курăмлă вырăнта — президент сăн ÿкерчĕкĕ. Паллă пулчĕ — хальхи вăхăтри ĕç-пуçа сăнлаççĕ. Пуçлăхĕ хăй те (ун сăнарне Г.Бормотина питех те ăста калăпланă) сĕтел хушшинче хутсем уçкаласа тем шырать, куçлăхне шăла-шăла хутран-ситрен çыркалать, хăйне мăнаçлăн тыткалать. Чăн та, пуçлăхсен пурнăçне пит аван пĕлсе кăтартнă автор: паянхи кун хутсене вăхăтра тĕрĕс-тĕкел туса пырсан — эсĕ лайăх ĕçлетĕн, хут тума пĕлеймерĕн е ерçеймерĕн — начаррисен шутне кĕртсе хураççĕ. Пуçлăхсене питлени çеç мар, пурнăçри ытти кăлтăк-мăкăлтăка та пит аван сăнласа пачĕç ялти артистсем. Эрех-сăрапа иртĕхни, пирус сĕрĕмĕпе чыхăнни, наркотиксемпе çыхланни ырри патне илсе çитерменнине пурте чухлатпăр вĕт ĕнтĕ. Ар çынсемпе хĕрарăмсем хушшинчи çыхăнусене ирĕке яни те пуçа кастарать. Çĕр-шывăмăрти чылай ял-хулари кил-çурт е ытти объектсене тăвасси вăраха кайнă тĕслĕхсене те (вырăссем çак пулăма валли питех те вырăнлă «долгострой» сăмах шыраса тупнă) питлеме манмарĕç. Пурте пĕлекен киревсĕр пулăмсем çинчен культура çуртĕнче яр-уççăн калани вара пурне те тепĕр хут шухăша ячĕ.

Артистсен ячĕсене те асăнмасăр хăварас килмест. Ял çыннисен умне тĕрлĕ çĕрте вăй хуракан Е.Степанова, Г.Бормотина, С.Белкова, М.Белкова, Ф.Кополухина, А.Пушкина, Л.Ятманова, М.Ятманова, Н.Хлебникова тухрĕç. Тĕлĕнмелле: арçын ролĕсене те хăйсемех калăпласа пачĕç. Ахальтен каламан ĕнтĕ халăхра: ÿркенмен ăста пулнă.

«Ятарласа вĕреннĕ артистсенчен пĕртте кая мар. Питех те лайăх вылярĕç хĕрсем хăйсен ролĕсене. Сăнарĕсене те кашни хăйне евĕрлĕ калăпланă. Ытти ялсене кайса кăтартмалла çак спектакле», — калаçрĕç çынсем килсене саланнă май. Жюри те артистсене лайăх хак парасси куçкĕрет.