23 апреля 2014 г.
Комсомольски районĕн 75 çулхи юбилейне тата Республика кунне халалланă смотр-конкурс малалла тăсăлнăçемĕн ял поселенийĕсенчи художество пултарулăх коллективĕсем хушшинчи тупăшу хĕрнĕçемĕн хĕрсе пырать. Кашни тăрăхран килнĕ артистсем хăйсем пултаруллă, юрă-ташăра ăста пулнине çирĕплетесшĕн тăрăшаççĕ. Ара, кашни ял поселенийĕн программинчен чи лайăх виçĕ номере Республика кунне валли суйласа илеççĕ-çке. Çак концертсене курма рай-центрта пурăнакансем çеç мар, ялсенчен те йышлăн килеççĕ.
Апрелĕн 18-мĕшĕнче смотр-конкурса Хырхĕрри ял поселенийĕн художество пултарулăх коллективĕсем малалла тăсрĕç. Концерт умĕн А.Н.Воробьев пуçлăх ял тăрăхĕн кулленхи пурнăçĕ, паллă çыннисемпе событисем çинчен тĕплĕн каласа пачĕ. Программăна Г.М.Перьев ертсе пыракан хор "Утса та килтĕмĕр", "Тăван çĕршыв", "Ты, Россия моя" юрăсене пысăк хавхаланупа юрларĕ. "Сударушка", "Палан" ансамбльсене çỹрекенсем илемлĕ те янăравлă юрăсемпе савăнтарчĕç. Маргарита Белкова, Людмила Нямукова, Дмитрий Федоров, Вера Горбуновăпа Надежда Корнилова юрланине куракансем ăшшăн йышăнчĕç. Хĕрачасен ташă ушкăнĕ хитре те интереслĕ ташăсем парнелерĕ.
Хырхĕррисем концерта тĕплĕн, тăрăшса хатĕрленнĕ. Çавăнпах ĕнтĕ залра ларакансем те вĕсен кашни номерне хапăлласа йышăнчĕç. Хăш-пĕр юрăсене фонограммăпа юрлани çеç кăмăла кăштах пăсрĕ.
Апрелĕн 25-мĕшĕнче смотр-конкурса Хирти Сĕнтĕр ял поселенийĕ малалла тăсать. Яланхи пекех, концерт районти культурăпа кану центрĕнче 18.30 сехетре пуçланать, çитсе курăр.
Л.Шуряшкина
Источник: "Каçал Ен"