Публикации » Пурнăç çулĕпе юнашар

Нумаях пулмасть Эткер ялĕнче пурăнакан Лидия Тимофеевнăпа Георгий Серафимович Галкинсем пĕрлешсе çемье çавăрнăранпа 50 çул çитнине уявларĕç. Вĕсене саламлама халăх йышлăн пуçтарăнчĕ. Хырхĕрри ял поселенийĕн пуçлăхĕ А.Н.Воробьев, хĕрарăмсен совечĕн вырăнти уйрăмĕн председателĕ В.А.Горбунова тата ыттисем те чылай ăшă сăмах каларĕç, парнесемпе савăнтарчĕç. Хаçат вулаканĕсене те юбилярсемпе паллаштарас килет.

Лидия Тимофеевна 1941 çулта Эткер ялĕнче çуралнă. Комсомольскинче вăтам шкул пĕтернĕ хыççăн Патăрьелĕнчи ял хуçалăх шкулĕнче ăс пухнă, ветеринар-фельдшер дипломне алла илнĕ. Ун хыççăн Пăвари ветеринари техникумĕнче вĕренсе ăсталăхне аталантарнă. Дипломлă специалист тăван района таврăннă, малтан «Красный маяк» колхозра, унтан Урмаелĕнче ветеринарта тăрăшнă. Çавăн пекех «Комсомольский» совхозра, районти ветеринари станцийĕнче чылай çул ĕçленĕ. Выльăх-чĕрлĕхе мĕн ачаран юратнипе çак профессие суйланă Лидия Тимофеевна. Чунне парса ĕçленĕрен ĕнтĕ ăна Хисеп грамотисемпе, медальсемпе пĕрре мар чысланă, ял çинче хисепе тивĕçнĕ тăрăшуллă хĕрарăм.

Георгий Серафимович та ялта ĕçченлĕхĕпе палăрса тăрать. 1940 çулта Эткер ялĕнче кун çути курнăскер, Кĕçĕн Каçал шкулĕнче 7 класс пĕтернĕ. Ун хыççăн Комсомольскинчи ДОСААФ шкулĕнче вĕренсе водитель правине алла илнĕ. «Красный маяк» колхозра, райпо тытăмĕнче, Комсомольскинчи сельхозтехникăра тата ытти çĕрте те вăй хунă вăл. Ун чухне хальхи пек ăшă гаражсем пулман. Çавна кура хĕлле шоферсем автомашинăсене юсанă вăхăтра аллисене тăм илтернине халĕ те аса илет Георгий Серафимович. Сăмах май, вĕсем мăшăрĕпе иккĕшĕ те чылай çул ырми-канми вăй хунăшăн Ĕç ветеранĕ ята тивĕçнĕ.

Галкинсем икĕ ача çуратса пурнăç çулĕ çине кăларнă. Эльвира районти тĕп больницăн хирурги уйрăмĕнче медсестрара ĕçлет. Володя Хусанти танкистсене хатĕрлекен аслă училищĕне пĕтернĕ, халĕ Сĕнтĕрвăрринче çемйипе пурăнать. Ашшĕ-амăшĕ пекех тăрăшуллă та ĕçчен вĕсем, пĕр самант та алă усса лармаççĕ.

Лидия Тимофеевнăпа Георгий Серафимович ялта та, районта та сумлă çынсем. Кам та пулин йывăрлăха лексен, вĕсем халĕ те яланах пулăшма хатĕр. Эпир вĕсене юбилей ячĕпе чун-чĕререн тухакан чи ырă та ăшă сăмахсемпе саламлатпăр, вăрăм ĕмĕр, çирĕп сывлăх сунатпăр.