08 февраля 2014 г.
Паллă, хальхи вăхăтра сывă пурнăç йĕрки курăмлă вырăн йышăнать. Çакна мăн çынсем те, ачасем те лайăх ăнланаççĕ, темелле. Мĕн пĕчĕкрен спортпа туслаштарас кăмăлпа Хырхĕрри тĕп шкулĕнче чылай ăмăрту йĕркелеççĕ.
Сăмахран, иртнĕ эрнере 5—9-мĕш классенче вĕренекенсем хушшинче «Хаваслă стартсем» иртрĕç. Хĕрÿ тупăшура саккăрмĕш тата тăххăрмĕш классен ушкăнĕсем пĕр пек балл пуçтарса пĕрремĕш вырăна тухма пултарчĕç (капитанĕсем Стас Белков (9 кл.) тата Даниил Никитин (8 кл.). Çĕнтерÿçĕсене çийĕнчех хисеп хучĕсем парса хавхалантарчĕç.
Пĕтĕм çĕр-шыв «Лыжня России — 2014» старта тухнă май, пирĕн шкул ачисем те айккинчен пăхса тăмарĕç. Йĕлтĕрсем сырса йĕлтĕр йĕрĕ çине васкарĕç. Кĕçĕн классенче вĕренекен арçын ачасем хушшинче Дима Ярабаров тата Ильяпа Яков Исаев пĕр тăвансем мала тухрĕç. Хĕр ачасенчен Вика Смирнова, Майя Михеева тата Лариса Малышева маттур пулчĕç. 5—9-мĕш классенче вĕренекен арçын ачасенчен чи пултаруллисем — Алешăпа Саша Корниловсем, Владик Хлебников тата Кирилл Лепешкин. Çак ушкăнрах хĕр ачасем хушшинче Настя Кузнецовăна, Настя Исаевăна тата Таня Хлебниковăна çитекенни пулмарĕ. Вĕрентекенсем те хаваспах йĕлтĕрпе ăмăртма кăмăл турĕç.
Ытлари кун татах тепĕр ăмăрту: хальхинче — пневматикăллă винтовкăран тĕл перес енĕпе. Арçын ачасем хушшинче 6-мĕш класра вĕренекен Кирилл Лепешкина, хĕр ачасем хушшинче 9-мĕш класра вĕренекен Анжела Казиковăна çитекенни пулмарĕ.
Çак тупăшусене пурне те шкулта физкультура предметне вĕрентекен Алексей Викторович Гаврилов хатĕрлесе ертсе пычĕ. Пултаруллă учитель ăмăртусене пĕлсе йĕркелет. Малашне те вĕрентекенпе ачасене ăмăртусенче ăнăçу кĕтсе тăтăр. Чи кирли вара — спортпа туслашни сывлăха усă кÿнинче.
Г.БЕЛКОВА, вĕрентекен.
Источник: "Каçал Ен"