25 января 2014 г.
«Восток» ял хуçалăх производство кооперативĕнче тăрăшакансем çурхи тата кĕрхи культурăсен 250 тонна вăрлăхне СМ-4 техникăпа алласа пĕтерчĕç. Пĕр уйăха яхăн йĕтем çинче кунсерен 15-шер çын — 2-мĕш бригада — ĕçлерĕ.
«Кунсерен кĕлете 25—30-шар тонна вăрлăх кĕртрĕмĕр. Ăна ГАЗ-53 маркăллă автомашинăпа 3—4-шар рейс туса Викентий Ятманов турттарчĕ»,— терĕ Зинаида Павловна Андреева, тунă ĕçсемпе паллаштарса. Сăмах май, вăл — тĕп экономист, вăлах — тĕп бухгалтер та.
Светлана Белкова бригадир рабочисемшĕн ырă тĕслĕх вырăнĕнче. Аллас ĕçе вĕçлес умĕн урамра сивĕ 13 —15 градусран аяларах ансан та ĕçе пăрахман «Востоксем». Хурал пÿртне черетпе кĕрсе ăшăнса пĕр-пĕринпе улшăнса ĕçленĕ.
Уйрăмах çакăнта хастар ĕçленĕ пенсионерсене палăртса хăварас килет. Вĕсем: Маргарита Белкова, Зинаида Пушкина, Елена Хлебникова тата Елена Чернова. Елена Коновалова, Галина Белкова, Фаина Кополухина, Галина Морозова, Алина Коновалова, Валентина Коновалова, Валентина Михеева, Антонина Хлебникова, Светлана Можаева тата Галина Петрова рабочисем те тăрăшуллă.
«Юрă ĕçре пулăшать» тесе ахальтен каламаççĕ ĕнтĕ. Юрă-ташăпа туслă хĕрарăмсем хушăран юрăсем шăрантарнă, пурнăçри шÿтлĕ лару-тăрусене те аса илсе каласа култарнă.
Техникăна сÿнтернĕ вăхăтра вара Зинаида Павловна ĕçченсене Раççейри пенси реформисемпе тата Ĕç кодексĕнчи çĕнĕлĕхсемпе паллаштарнă
М.ИЛЛАРИОНОВА.
Источник: "Каçал Ен"