21 декабря 2013 г.
Декабрĕн 18-мĕшĕнче районта черетлĕ информаци кунĕ иртрĕ. Район çыннисен пурнăçĕпе паллашма, вĕсен тĕрлĕ ыйтăвĕсене хуравлама, уçăмлатма Шупашкар хулинчен тĕрлĕ ведомство начальникĕсемпе специалисчĕсем килсе çитрĕç.
Раççейре 2014 çул Культура çулталăкĕ тесе палăртнă. Хырхĕрри ялĕнче пурăнакансемшĕн культура çуртне информаципе культура центрĕ ят пани, ăна савăнăçлă лару-тăрура уçни пысăк парне пулчĕ. Уяв ячĕпе Хырхĕррисене ЧР информаци политикин тата массăллă коммуникацисен министрĕн çумĕ Л.Е.Шемарина, район администрацийĕн пуçлăхĕн ĕçĕсене пурнăçлаканĕ, ял хуçалăх тата экологи пайĕн начальникĕ И.Х. Миннетуллин, культура секторĕн заведующийĕ В.С. Васильев, Хыр-хĕрри ял тăрăхĕн пуçлăхĕ А.Н. Воробьев ăшшăн саламларĕç.
Паянхи куна районта информаципе культура центрĕсем пурĕ улттă. Вĕсене ĕçре усă курмалли кирлĕ оборудованипе республика тата вырăнти бюджетран укçа-тенкĕпе тивĕçтернĕ. Унпа пĕрлех шăпах, уяв кунĕнче Хырхĕрри информаципе культура центрĕн директорне В.А. Горбуновăна компьютер техникипе, сцена костюмĕсемпе, музыкăпа çутă оборудованийĕсемпе тивĕçтерекен сертификата парса чысларĕç. Хырхĕррисем юрă-ташăра яланах маттур. Вĕсем районта, республикăра иртекен мероприятисене, конкурссене хастар хутшăнаççĕ. Хырхĕрринчи чăвашсен «Палан» тата вырăссен «Сударушка» фольклор ансамблĕсене таврара пĕлмен çын çук та пулĕ. Хырхĕрринчи информаципе культура центрĕ малашне ялта пурăнакансемшĕн чăн-чăн культура çăл куçĕ, пултарулăх керменĕ пуласса шанатпăр. Чăваш Республикинчи пур культура çурчĕсене те тĕрлĕ енлĕ аталантарас, çĕнетес енĕпе чылай ĕç пурнăçланать. Тĕслĕхрен, 2008—2013 çулсенче 159 культура учрежденине тĕпрен юсаса çĕнетнĕ. Çакна пурнăçлама республика бюджетĕнчен 107,7 миллион тенкĕ, вырăнти бюджетран 162 миллион тенкĕ укçа уйăрнă.
Источник: "Каçал Ен"