17 августа 2013 г.
Районти «Çĕр тата çынсем» музее Сергей Кудрявцевран çыру килнĕ. Вăл — Ярославльти П.Г.Демидов ячĕллĕ патшалăх университечĕн истори факультечĕн магистранчĕ. Пирĕн ентешĕн Иван Шашкинăн, Аслă Аттелĕх вăрçи вăхăтĕнче хыпарсăр çухалнăскерĕн, шăпине уçăмлатнине пĕлтернĕ унта. «Иртнĕ çул хамăн асаттен ашшĕн ÿчĕ ăçта выртнине тупса çирĕплетме май килчĕ. Çавăнтанпа унпа пĕрле Германири Айзенах хулинче (Тюрингия çĕрĕ) пытарнă çынсем çинчен те тĕпчетĕп. Айзенахри тăванла масар çинче Комсомольски районĕнче çуралса ÿснĕ, халиччен хыпарсăр çухалнă тесе шутланнă Иван Никитич Шашкинăн (5(6).01.1916 – 05.08.1943) ячĕ те пур. Вăл е Хурнай, е Хырхĕрри ялĕнче пурăннă, ял хуçалăхĕнче ĕçленĕ. Çемьеленсе ĕлкĕрнĕ е çук — паллă мар. Амăшĕ, Александра Сергеевна Шашкина, Хурнай ялĕнче, София Шашкина (Иваншăн кам пулнине палăртман) Хырхĕрринче пурăннă.
Иван Шашкина Комсомольски çар комиссариачĕ 1941 çулхи июнĕн 29-мĕшĕнче çара ăсатнă. Хыпарсăр çухалнă тесе 1948 çулхи январĕн 31-мĕшĕнче шута илнĕ. 118-мĕш стрелоксен дивизийĕн 527-мĕш стрелоксен полкĕн хĕрлĕ армеецĕ 1941 çулхи августăн 8-мĕшĕнче Эстони ССРĕнчи Раквере хули таврашĕнче тыткăна лекнĕ. Пирвай Германири Мюльберг хули çывăхĕнчи лагерь узникĕ пулнă, кайран тĕрлĕ çĕре куçарса çÿренĕ, йывăр ĕçсем пурнăçлакан командăра тăнă. 1942 çулта вăл чирлесе лазарета лекнĕ. Нимĕç тыткăнĕнчех, 1943 çулхи августăн 5-мĕшĕнче, пурнăçĕ татăлнă. Ÿтне Айзенах хулинче пытарнă. Хушаматне йăнăшпа «Шахкин Иван 1916» тесе çырнă.
С.Д.Кудрявцев çав справкăпа пĕрлех тыткăнри çар çыннин И.Н.Шашкинăн персоналлă карттине те ярса панă. Çапла майпа вăл 70 çултан пирĕн ентешĕмĕрĕн çул-йĕрне тупса палăртма пулăшнă.
Источник: "Каçал Ен"