Публикации » Уяв ячĕпе

Пирĕн çĕр-шывра чÿк уйăхĕн юлашки канмалли кунне Анне кунĕ тесе паллă тăваççĕ. Кăçал уяв иртнĕ вырсарни куна — чÿкĕн 25-мĕшне килчĕ. Уяв хальлĕхе çамрăк пулин те, пурнăçра хăйĕн вырăнне тупрĕ те ĕнтĕ. Çĕр-шыври кашни кĕтесрех ун ячĕпе концертсем, тĕл пулусем тата ытти мероприятисем ирттереççĕ.

Хырхĕрри тĕп шкулĕн вĕренекенĕсем те уява кашни çулах паллă тăваççĕ. Çак кунсенче Р.Т.Морозова музыка учителĕпе В.Ф.Лепешкина аслă вожатăй хатĕрленипе ачасем ялти ÿнер çуртĕнче пысăк уяв концерчĕ лартса пачĕç. Чăн малтан саламлă сăмахсемпе ялти хĕрарăмсен совечĕн ертÿçи В.А.Горбунова тухса калаçрĕ. Ялти обществăлла тата художество пултарулăх ĕçне хастар хутшăнакан Г.В.Шиковăна тата Н.А. Корниловăна Хисеп хучĕсем парса чысларĕ. Хырхĕрри ял поселенийĕн администраци пуçлăхĕ А.Н.Воробьев та пуçтарăннисене ăшшăн саламларĕ. Концертра тĕрлĕрен юрă-кĕвĕ, сăвăсем, шÿтлĕ сценкăсем пулчĕç. Ташă кружокне çÿрекен аслă тата кĕçĕн хĕр ачасен ушкăнĕсем илемлĕ ташласа савăнтарчĕç. Куракансем вара çамрăк артистсене тăвăллăн алă çупса тав турĕç.