Публикации » Шкулта хаçат тухма тытăнчĕ

Юпа уйăхĕнче Хырхĕрри тĕп шкулĕнче тĕрлĕ кружоксем ĕçлеме тытăнчĕç. Ачасем хаваспах ал ĕç, спорт, хор, ташă, моделировани кружокĕсене суйласа илчĕç. Журналистсен кружокне çÿреме кăмăл тăвакансем те пулчĕç. Иртнĕ уйăх вĕçĕнче кружока çÿрекенсем вĕрентекенсемпе вĕренекен юлташĕсене хăйсен пĕрремĕш хайлавĕсемпе паллаштарчĕç. Вĕсемпе шкул коридорĕнче курăмлă вырăна вырнаçтарнă «Шкул хыпарĕсем» хаçатра вуласа паллашма май пулчĕ. Çамрăк çыравçăсем çырнă хайлавсемпе пĕрлех шкул пурнăçĕнчи сăн ÿкерчĕксем те илем кÿчĕç хаçатăн пĕрремĕш номерне. Хаçата кăларас ĕçре уйрăмах Диана Ятмановăпа София Никонован тÿпи пысăк. Малашне те ачасем çак ĕçе хутшăнас кăмăллă.