19 мая 2012 г.
Комсомольски районĕнчи “Восток” - лайăх хуçалăхсенчен пĕри. Унта та, Каçал тăрăхĕнчи ытти кооперативри пекех, çурхи ĕç шавĕ тăрать. Акана пĕлтĕрхипе танлаштарсан каярах тухнă пулин те пуç усмаççĕ Хырхĕррисем. Эпир пынă тĕле /çу уйăхĕн 15-мĕшĕнче пулнăччĕ/ кунта урпа - 150, сĕлĕ - 40, тулă 40 гектар акнăччĕ. Ытти хуçалăхри пекех кунта та кĕрхи культурăсем начар хĕл каçнă, çавăнпа 250 гектарне çĕнĕрен акма тивнĕ.
Эпир Комсомольски район администрацийĕн тĕп агрономĕпе Илдус Минетуллинпа тата “Восток” хуçалăхăн ертÿçипе Валерий Михеевпа хире çитсе куртăмăр. Юрий Белков “çăпаталлă” тракторпа çĕре сÿрелет. Вячеслав Белков çамрăк механизатор вара Т-150Г çăпаталлă “хурçă утпа” /сăмах май, районта кунашкал техника тек çук терĕç/ культиваци тăвать. Ку хирте тулă, урпа ÿсĕ.
“Çăпаталлă” тракторсене малашне музейра кăна курăпăр ĕнтĕ. Районта питĕ сахал юлчĕç вĕсем. Хуçалăхсем çĕнĕ йышши техника ытларах туянаççĕ”, - шухăшне палăртать Илдус Хадзятович.
Кăçал çĕр пĕр пек пиçсе пыманни пăшăрхантарать Валерий Михеева. “Йĕпе вырăн чылай пулнăран хăш-пĕр хире кĕрейместпĕр. Вăрлăх та, техника та тахçанах хатĕр ĕнтĕ. Çавăнпа “çăпаталлă” тракторсене пăрахăçламалла мар. Урапаллипе кĕреймен çĕре те çитме пултараççĕ вĕсем. Çĕре те пусăрăнтармаççĕ”, - калаçăва хутшăнать Валерий Геннадьевич.
“Востоксем” паян-ыранах çĕр улми лартма пикенĕç. “Иккĕмĕш çăкăр” кăçал 100 гектара яхăн лаптăк йышăнĕ. Çавăн чухлех куккурус акма палăртнă. Галинăпа Елена Шиковăсем, Нина Порфирьева поварсем вĕри апата кунне икĕ хут хире илсе тухаççĕ. Хырхĕррисем çу уйăхĕн 20-мĕшĕччен йăлтах акса-лартса пĕтерме палăртаççĕ.
Источник: "Хыпар"