Публикации » Ăстасен ĕçĕсемпе паллашăр

Районти ăстасем хушшинче 2012 çулта «Фантазия» конкурс ирттерме палăртнă. Конкурсра пĕтĕм ăста хăйĕн алăпа тунă япалисене тăратма пултарать. Районти «Çĕр тата çынсем» музейре куравсем иртеççĕ.

Пуçласа конкурса Элпуç ял тăрăхĕн ăстисем хăйсен ĕçĕсене тăратнă. Ĕçсем тĕрлĕ енлĕ: çыхнă минтерсем, кофтăсем, ачасен ĕçĕсем тата ытти те.

Февралĕн 6-мĕшĕнче конкурса малалла Хырхĕрри ял поселенийĕн ăстисем тăсрĕç.

Курава Р.Т.Лепешкина хăй аллипе ăсталанă тухьясене тăратнă. Çак чăваш хĕрарăмĕ пуçа тăхăнмаллисене кинĕсене, хĕрĕсене парнеленĕ. Хăй вăхăтĕнче ветфельдшерта ĕçленĕ, пилĕк ача çуратса ура çине тăратнă. Халĕ вара пушă вăхăтсенче алă ĕçĕпе йăпанать.

А.Д.Емельянова районта иртекен куравсене активлă хутшăнать. Унăн аллисем ылтăн. Ăна таврара пĕлмен çын та çук. Хальхи курава А.Д.Емельянова çыхнă илемлĕ кофтăсем тăратнă.

Татьяна Пожеданова вырăн çине витмеллисем çыхать. Çакăн йышши япаласене вăл Çурçĕре çити ярса парса сутать.

Наташа Чернова Мускавра пурăнать пулин те, тăван ялпа тачă çыхăну тытать. Вăл тиртен чĕрчунсем çĕлесе ăсталать.

Надежда Морозова тĕрлĕ тĕслĕ çипрен çыхнă алсасем тăратнă. Г.В.Толстова почтальонкăра ĕçлет, пушă вăхăтра чĕнтĕр йĕппипе тĕрлĕ япаласем çыхать.

Оля Смирнова, Комсомольски 2-мĕш вăтам шкулĕн 10-мĕш «а» класс вĕренекенĕ, вĕт шăрçапа ĕçлеме юратать.

В.В.Горбунова тутăрсем çыхать, хăйĕн юлташĕсене парнелесе савăнтарать. Пĕчĕк пуканесене хитре тумсем тăхăнтартать.

Хырхĕрри ял поселенийĕнче пурăнакан ар çынсем те маттур. В.Захаров консерва банкисене касса, авса сĕтелсем, пукансем хатĕрлет. Ильдус Вахитов шкатулка ăсталать, В.Ф. Иванов та илемлетнĕ хыçлă пĕчĕк çунасем туса хатĕрлет. Г.Н.Петров вĕрентекен ĕç урокĕнче ачасене хăй ăсталăхĕпе паллаштарать: карçинккасем çыхасси, йывăçран касса япаласем тăвасси.

Ялта ĕç-пуç нумай. Анчах та ăстасем хăйсен юратнă ĕçĕсем валли пушă вăхăт тупаççех. Малалла та вĕсене çак йышши япаласене ăсталама çирĕп сывлăх, телей, ăнăçу сунас килет.

Асăннă ăстасен куравĕпе паллашма районти музее чĕнетпĕр. Килсе курăр, шеллемĕр. Курав февралĕн 6-мĕшĕнчен пуçласа 26-мĕшĕччен ĕçлет.