Публикации » Н.Ятманова халалласа йĕлтĕр эстафети иртнĕ

Педагогика ĕçĕн ветеранĕ, паллă спортсмен, Хырхĕрри тĕп шкулĕн физкультура учителĕ Николай Никандрович Ятманов 2012 çулхи январьте 60 çул тултарчĕ. Хăйĕн юбилейне халалласа вăл 5х3 çухрăмлă йĕлтĕр эстафети йĕркеленĕ. 5 тапхăрне те хăй хутшăннă, çĕнтерÿçĕ ятне тивĕçнĕ. Эстафетăна 13 шкул команди, ялти спортсменсем, çемье командисем хутшăнма кăмăл тунă.

Н.Ятманов ĕçлеме пуçланăранпах профсоюз активисчĕ шутланать. Çавăнпа та çак паллă кун профсоюз сывлăхлă пурнăç йĕркине пропагандăлакан учителе пур енлĕн пулăшу пама тăрăшнă. ЧР Патшалăх Канашĕн депутачĕ, «Газпром межрегионгаз Чебоксары» ООО генеральнăй директорĕ К.Мифтахутдинов, Хырхĕрри ял поселенийĕн пуçлăхĕ А.Воробьев, Пенси фончĕн районти управленийĕн начальникĕ С.Горбунов тата ыттисем те тухса калаçнă, Н.Ятмановăн çамрăк ăрăва тĕрĕс воспитани парас ĕçри пысăк тÿпине палăртнă. Вĕренÿ профсоюзĕн Чăваш рескомĕн президиумĕн членĕ, РООн аслă методисчĕ А.Яковлев пултаруллă учителе Чăваш профсоюз рескомĕн Хисеп грамотипе, республикăпа районти профсоюз организацийĕсен премийĕсемпе чысланă.