Публикации » Тăван ен культурипе иртнĕ пĕремĕш олимпиада призерĕ

Пирĕн республикăри шкулсенче тăван ен культурине 1992 çултанпа вĕрентеççĕ. Малтанхи вăхăтра çак предмета вĕрентме çăмăлах пулмарĕ пулин те, халь йывăрлăхсем хыçа юлчĕç тесен те йăнăш пулмасть пуль. Ачасем валли 4-мĕш класран пуçласа 8-мĕшне çитичченех ятарлă вĕренÿ кĕнекисем хатĕр, вĕсемпе ĕçлеме ĕç тетрачĕсем те çителĕклĕ кăларнă. Шкулсене уроксенче усă курма ятарласа ÿкернĕ видеофильмсем те килсе çитнĕ. Паллах, çак утăмсем ачасене тăван ен культурине вĕренме малалла хавхалантараççĕ.

Уроксенче илнĕ пĕлÿпе усă курма пултарнине Хырхĕрри тĕп шкулĕнче вĕренекен ачасем те кăтартса параççĕ. Харăсах икĕ çул — 2006 тата 2007 — М.Белкова вĕренекен республикăра ирттернĕ «Туслăх хĕлхемĕ» фестивале («Асамат» номинаци) хутшăнса виççĕмĕш вырăн йышăнма пултарчĕ. Халĕ вара Шупашкартан тепĕр савăнăçлă хыпар çитрĕ: шкулта 9-мĕш класра вĕренекен Александра Федорова республикăра кăçал пĕрремĕш хут тăван ен культурипе иртекен олимпиадăра виççĕмĕш вырăна тухма пултарчĕ.

Сăмах май каласан, тăван ен культурипе районта иртекен олимпиадăсене Саша 7-мĕш класранпах хутшăнать, яланах призерсен шутне кĕрет. Çак вĕренÿ çулĕнче вара пултаруллă хĕр ача тăххăрмĕшсем хушшинче мала тухма пултарчĕ, çавăнпах ĕнтĕ хамăр район чысне республика шайĕнче хÿтĕлеме тивĕçрĕ. Ытти предметсемпе те вăл аван ĕлкĕрсе пырать. Право, обществознани, биологи, математика предмечĕсемпе те район шайĕнче иртнĕ олимпиадăсенче малтисен шутĕнче. Мал ĕмĕтлĕ хĕр ачана малашне те вĕренÿре ĕлкĕрсе пыма, çĕнĕ çитĕнÿсем тума ăнăçу сунатпăр.