Публикации » Çурхи кун çулталăк тăрантарнине яланах асра тытаççĕ

Кăçалхи акана «Восток» хуçалăх ĕçченĕсем тĕплĕн кĕтсе илнĕ. Тракторсем валли дизель топливи, автомашинăсем валли бензин çителĕклĕ хатĕрлесе хунă. Механизаторсем те хăйсене шанса панă техникăна юсанă.

Ял хуçалăх кооперативĕн ертÿçи В.Г.Михеев çуркуннене чи канăçсăр тапхăрсенчен пĕри тесе шутлать. Мĕншĕн тесен пĕрчĕллĕ тата пăрçа йышши тырăсене пахалăхлă, вăхăтра акнинчен тухăç нумай килет. «Акана апрелĕн 17- мĕшĕнче тухрăмăр. Уяр çанталăкпа туллин усă курасчĕ. Шел, кĕркунне 120 гектар çинче акса хăварнă кĕрхи тырăсем шăннă. Вĕсем вырăнне тепĕр хут урпа тата пăрçа йышши ытти культурăсем акма тивет. Хуçалăхшăн ку, паллах, хушма тăкак»,— пăшăрханса пĕлтерчĕ председатель. Апла пулсан та «Восток» кооператив членĕсем йывăрлăхсене çĕнтерсех пыраççĕ.

Вĕсем уй-хирти çурхи ĕçсене чылай пурнăçланă. Кăçал тыр-пула 490 гектар çинче çитĕнтерме палăртнă. Çавăн пекех 100 гектар кукуруза, 63 гектар пĕр çул ÿсекен курăксем акса ÿстермелле.

«Тĕш-тырă ăнса пуласси вăрлăх пахалăхлă пулнинчен, удобренисемпе тĕрĕс усă курнинчен, агротехника ĕçне вăхăтра пурнăçланинчен килет»,— тет уй-хирти ĕçсемпе паллаштарса тĕп агроном В.Т.Петров.

Çĕр улмине кăçал 100 гектар çине лартмалла. «Невский», «удача» тата ытти сортсем те ÿстерме палăртнă. «Иккĕмĕш çăкăр» вăрлăхне суйланă çĕрте кунсерен 25-шер рабочи тăрăшнă.

Хуçалăх хирĕсенче кашни кун Алексей Федоров, Геннадий Ершов, Евгений Порфирьев, Леонид Зайцев тата Андрей Захаров МТЗ-80, МТЗ-82 маркăллă тракторсемпе тăрăшаççĕ. Сÿренĕ çĕрте те ĕç хĕрÿ пырать. Ку енĕпе Юрий Белков тата Владимир Смирнов вăй хураççĕ. Культиваци тăвакан Алексей Белков, Геннадий Чернов тата Сергей Хлебников та маттур.

Анна Яковлевăпа Марина Порфирьева поварсем çĕр ĕçченĕсене кунне икĕ хутчен вĕри апатпа тивĕçтереççĕ.

Çитес кунсенче «иккĕмĕш çăкăра» лартма тухасшăн. Хуçалăх хирĕсенче чарăнми ĕç пырать. Çак яваплă тапхăр вĕçленнĕ хыççăн тăрăшуллă ĕçченсене тата ытти ĕçсем те кĕтеççĕ.