Публикации » Хырхĕррисем вĕрентекенсене чысларĕç

2010 çул Раççей Президенчĕ Д.Медведев хушăвĕпе килĕшÿллĕн Вĕрентекен çулталăкĕ ятпа иртнине вулакансем пĕлеççĕ ĕнтĕ. Çак хушăва пурнăçа кĕртес тĕлĕшпе çĕршыври хуласемпе ялсенче тĕрлĕ мероприятисем иртеççĕ.

Хырхĕрри тĕп шкулĕнче те нарăс уйăхĕнче савăнăçлă лару-тăрура паллă çула уçрĕç. Чăн малтанах аслă вожатăй В.Ф.Лепешкина РФ Президенчĕн Указĕпе паллаштарчĕ. Саккăрмĕш класра вĕренекен Федор Ятмановпа Женя Белков «Не смейте забывать учителей» сăвва илемлĕ вуласа пачĕç. Вĕсене тĕрлĕ классенчи ачасемпе пĕрле юратнă вĕрентекенĕсем тимлесе итлерĕç.

Малалла вара вĕрентекенсене чысласа Хырхĕрри культура çуртĕнче пысăк концерт иртрĕ. Çак кун унта халăх йышлă пуçтарăнчĕ. Хырхĕрри тĕп шкулĕн ертÿçи Ю.П.Алексеев пурне те Вĕрентекен çулĕ ячĕпе саламларĕ. Уява ачасен хорĕ пуçларĕ. Программăра вырăсла-чăвашла юрă-кĕвĕ янăрарĕ. Хĕрсен вокал ушкăнĕ шăрантарнă «Речка» тата вырăс халăх юррисем уйрăмах куракансен кăмăлне кайрĕç. Людмила Нямукова чĕрене пырса тивекен сассипе тыткăнларĕ.

Культура çурчĕ çумĕнчи ташă кружокне çÿрекенсем ташăсемпе савăнтарчĕç, ытларах «Морячка», «Солнечный круг», Хĕвел Анăç ташши кăмăла кайрĕç. Драма кружокĕн членĕсем кĕске сценкăсемпе паллаштарчĕç. Уяв программине шкул ачисем илем кÿрсе тăчĕç. Луиза Нигматуллина «Гномики», Настя Горбунова «Мама», Вита Федоровăпа Ирина Иванова «Мышки» юрăсене уйрăмах илемлĕ янăратрĕç. София Никонова «Не волнуйся, папа» юрланине залра ыттисемпе пĕрлех ашшĕ те кăмăллăн кулса итлесе ларчĕ. Кашни номере куракансем тăвăллăн алă çупса кĕтсе илчĕç.

«Чăн та, артистсенчен пĕртте кая мар»,— калаçрĕç куракансем килсене саланнă май. Вĕрентекен çулне халалланă концерта хатĕрленĕ Хырхĕрри культура çурчĕн ĕçченĕсене пысăк тав сăмахĕ калас килет.