08 апреля 2016 г.
Çĕнĕ Кипеçпе Тĕвенеш ялĕсенче хастар, пултаруллă хĕрарăмсем пурăнаççĕ. Вĕсем ĕçре те, юрă-ташăра та маттур.
Ялти хĕрарăмсенчен чылайăшĕ культура çурчĕ çумĕнчи пултарулăх ушкăнне çỹрет. Вĕсемсĕр пĕр мероприяти те иртмест. Юрра-ташша кăмăллакансене культура çурчĕн директорĕ Людмила Можаева йĕркелесе ертсе пырать, музыка енĕпе - Павел Иванов. Пултарулăх ушкăнне çỹрекен хĕрарăмсем: Елена Васильева, Алевтина Смирнова, Елена Козлова, Валя Герасимова, Маргарита Данилова, Лена Алексеева, Мира Жгун, Галя Новикова. Хăйсен çепĕç те янăравлă сассисемпе ял халăхне тыткăнлаççĕ. Е.Васильевăпа А.Смирнова тивĕçлĕ канура ĕнтĕ, çапах та вĕсем яланах сцена çинче. Хăйсен хитре юррисемпе, илемлĕ сассисемпе халăха савăнтараççĕ. Ыттисем тĕрлĕ çĕрте вăй хураççĕ. Мира Жгун Санкт-Петербург хулинчен яла канма килнĕ. Вăл - Тĕвенеш хĕрĕ. Мира хăйĕн çамрăклăхне аса илсе çав вăхăтри юрăсемпе сцена çине тухать. Унăн хитре сасси кăмăла çĕклет.
Пултарулăх ушкăнĕ лартакан концертсене халăх йышлăн çỹрет.
Ял çыннисем вĕсене ырлăх-сывлăх сунаççĕ, илемлĕ юррисемпе, хитре сассисемпе сцена çинче кĕтеççĕ.
Г.НОВИКОВА.
Çĕнĕ Кипеç ялĕ
Источник: "Каçал Ен"