19 июля 2014 г.
Районти ял хуçалăх предприятийĕсем, фермер хуçалăхĕсем, колхозсем аван ĕçлесе пыраççĕ. Палăртнă ĕçсене вăхăтра пурнăçлаççĕ. Кăçал çур акине вăхăтра вĕçленĕ, ут çире те аван ĕçлеççĕ, часах вырмана тухма хатĕрленеççĕ. Маттур ĕçлесе пыракансенчен тĕслĕх илмелли те пурах.
Çак тĕллевпе июлĕн 16-мĕшĕнче района кỹршĕсем, Йĕпреçсем, килсе çитрĕç. Ял хуçалăх предприятийĕсен ертỹçисемпе специалисчĕсем кунти ĕçченсемпе тĕл пулса калаçрĕç, хумхантаракан ыйтусене сỹтсе яврĕç. Йĕпреçсене чи малтанах район администрацийĕн пуçлăхĕ Михаил Афанасьев, ял хуçалăх тата экологи пайĕн начальникĕ Ильдус Миннетуллин кĕтсе илчĕç, лару-тăрупа, пурнăçланă ĕçсемпе, уйрăмах малта пыракан хуçалăхсен паха опычĕпе паллаштарчĕç.
Специалистсем Нĕркеçри патшалăх сăнав участокĕнче пулса курчĕç, кунта çитĕнтерекен ял хуçалăх культурисен уйĕсенче пулчĕç. Тĕрлĕ ял хуçалăх культурисене, пахча çимĕçсене ятарласа сăнаса ỹстерекен делянкăсене хак пачĕç. Çавăн пекех Николай Васильев фермер хуçалăхĕн уй-хирĕсене çитсе курчĕç, качакасене мĕнле ĕрчетнипе паллашрĕç. "Слава картофелю" агрофирма уйĕсенче çĕр улмине ятарлă агрегатсемпе шăварнине пăхрĕç, уй-хир культурисем мĕнле çитĕннине хакларĕç.
Источник: "Каçал Ен"