Публикации » Уявра савăнчĕç

Кĕрхи ĕçсене вĕçлесен уяв ирттересси — чăвашсен мĕн ĕлĕкренех пыракан йăли-йĕрки. Çамрăксене асатте-асаннесен йăлипе паллаштарассине вĕрентекенсем хăйсен тивĕçĕ тесе йышăнаççĕ. Нĕркеç вăтам шкулĕнче те çак уява çулсеренех йĕркелеççĕ. Ачасем унта хаваспах хутшăнаççĕ. Акă, нумаях пулмасть кĕçĕн классенче вĕренекенсен кĕрхи бал иртрĕ. Ăна Валерия Кирилловăпа Галина Федорова ертсе пычĕç. Чи малтанах вĕренекенсене С.Максимова библиотекарь чăвашсем уява ĕлĕкхи вăхăтра мĕнле паллă тунипе паллаштарчĕ. Çакă ачасемшĕн уйрăмах интереслĕ пулчĕ.

Ачасем кĕрхи тумсем хатĕрлени те мероприятие хăйне май илем кÿчĕ. Жюри членĕсем К.Кошкина, М.Свеклова, Н.Евграфова, Ю.Федорова, Ю.Воронова хатĕрленĕ тумсене чи илемлисем тесе палăртрĕç. Пахча çимĕçсенчен хатĕрленĕ юмах паттăрĕсен выставкипе ачасем те, ашшĕ-амăшĕсем те интересленсех паллашрĕç. Вĕренекенсем юрларĕç, ташларĕç, сăвăсем каларĕç.