Публикации » Çемье кунне уявларĕç

Раççейре Çемье кунне паллă тума пуçлани нумаях пулмасть, çапах та вăл пирĕн тăрăхра чи юратнă уявсенчен пĕри пулчĕ.

Çемье кунне уявлама ял халăхĕ Нĕркеçри информаципе культура центрĕнче пухăнчĕ. Чи малтанах Е.П.Волкова çемьен патшалăхри вырăнĕ çинчен каласа пачĕ.

Ун хыççăн сцена çине пурнăç çулĕпе 50 çул юнашар утакан сумлă çемье — Роза Гурьевнăпа Викентий Иванович Герасимовсем — хăпарчĕç. 5 ача çуратса ÿстерсе пурнăç çулĕ çине кăларнă вĕсем.

Каярахпа Нĕркеçри информаципе культура центрĕн директорĕ Михаил Кузнецов Ивановсен, Максимовсен, Волковсен, Кузнецовсен çемйисен хушшинче конкурссем ирттерчĕ.

Хĕрÿ тупăшура Оксанăпа Сергей Ивановсем «Спортпа туслă çемье» номинацире çĕнтерчĕç. Сиренăпа Василий Максимовсене «Вулама юратакан çемье» номинацире çитекеннисем пулмарĕç.

«Çемье — пурнăç пуçламăшĕ» номинацире Герасимовсем малтисем пулчĕç.

Çемьесемпе çакăн пек уявсене хутшăнни вĕсене çирĕплетме пулăшать.