Публикации » Тĕл пулу та, турнир та пысăк шайра иртрĕç

Нарăсăн 11-мĕшĕнче Нĕркеç вăтам шкулне районти Афган вăрçин ветеранĕсем В.Н. Гаврилов, Д.В.Мамуткин, Н.В. Белков, М.А.Киргизов, М.П.Кузнецов тĕл пулăва килчĕç. Ку мероприятие Совет çарĕсене Афганистанран кăларнăранпа 23 çул çитнине халалланă.

Ветерансене служба çулĕсене аса илме çăмăл пулмарĕ. Унтанпа нумай çул иртнĕ пулсан та пурте асрах. Салтак пурнăçĕн йывăрлăхĕсене чăтса ирттерни çинчен каласа пани ачасене тĕлĕнтерчĕ. Çак тĕл пулăва Чечен вăрçин ветеранĕ — шалти ĕçсен пайĕн подполковникĕ В.И. Ксенофонтов та хутшăнчĕ.

Шкул ачисем Афган тата Чечен вăрçин ветеранĕсене тĕрлĕ ыйтусем пачĕç, кĕçĕн классенчи ачасем юрăсем юрларĕç. Малалла хоккей турнирĕ иртрĕ. Турнира иккĕмĕш çул ирттереççĕ. Унта пурĕ 4 команда хутшăнчĕ. Турнира районти афганецсен союзĕн председателĕ В.Н.Гаврилов уçрĕ. Хирти Сĕнтĕр ял поселенийĕн пуçлăхĕ Г.Е.Ефремов спортсменсене ăнăçу сунчĕ. Вăййа Комсомольски тата «Кĕтне» ентешлĕх командисем уçрĕç. Вăйă питĕ хĕрÿ иртрĕ. Комсомольскисем 6:3 шутпа çĕнтерчĕç. Ун хыççăн «Нĕркеç» командăпа вырăнти вăтам шкул ачисем тупăшрĕç. Ветерансем те ăста вылярĕç, 4:1 шутпа çĕнтерчĕç. Виççĕмĕш вырăна тухассишĕн ачасемпе ентешлĕх команди каток çинче вăй виçрĕ. Шкул ачисем виççĕмĕшсем пулчĕç. Финалта вара «Нĕркеçпе» «Комсомольски» тĕл пулчĕç. Вăйă 2:2 шутпа вĕçленчĕ. Çĕнтерÿçĕсене палăртма хушма вăхăт кирлĕ пулчĕ.

«Ылтăн» шайбăна вара «Нĕркеç» командăн ăста выляканĕ В.Кошкин çапса кĕртрĕ. Кубок «Нĕркеç» командăна тивĕçрĕ. Турнир йĕркелÿçи М.П.Кузнецов ветеран-афганец спортсменсене Хисеп хучĕсем, асăнмалăх парнесем парса чысларĕ. «Турнир çулсеренех вăй илсе пырасса, унта ытларах команда хутшăнасса шанас килет»,— терĕ Михаил Петрович.

Мероприятие ирттерме пулăшнă спонсорсене тав сăмахĕ калатпăр.