Публикации » Шашка хăми çинче

Петр тата Николай Гладков спорт мастерĕсен ячĕпе шашка турнирĕ ирттересси Нĕркеç ялĕнче йăлана кĕнĕ ĕнтĕ. Кашни çулах йĕркелеççĕ ăна. Акă халĕ те нумаях пулмасть Нĕркеç вăтам шкулне шашка вăййине кăмăллакансем пуçтарăнчĕç. Чи малтанах район администрацийĕн пуçлăхĕ Г.Волков, федераллă патшалăх статистикин Чăваш Енри территориллĕ органĕн ертÿçин çумĕ П.Краснов, «Газпром межрегионгаз Чебоксары» ООО генеральнăй директорĕ К.Мифтахутдинов тата шкул директорĕ Н.Петрова тухса калаçрĕç, спортсменсене ăнăçу сунчĕç.

Хĕрÿ тупăшура арçынсем хушшинче Н.Индюков (Комсомольски) чемпион пулса тăчĕ. Патăрьелĕнчен килнĕ Н.Федоров 2-мĕш вырăн йышăнчĕ. В.Голубевпа А.Волков (Нĕркеç) 3-мĕш вырăнсене тухрĕç.

Хĕрарăмсем хушшинче 1-мĕш вырăнта — С.Смирнова (Нĕркеç), 2-мĕш вырăнта — Е.Иванова.

Шкул ачисем те ăмăртăва хастар хутшăнчĕç. Арçын ачасем хушшинче А.Порядков (Нĕркеç) çĕнтерÿçĕ пулса тăчĕ, Н.Волковпа (Нĕркеç) К.Алексеев (Янкасси) 2—3-мĕш вырăнсене пайларĕç. Хĕр ачасем хушшинче Н.Тишовăна (Нĕркеç) çитекенни пулмарĕ. С.Грачева (Нĕркеç) — 2-мĕш, Д.Иванова (Шупашкар) 3-мĕш вырăнсене йышăнчĕç.

Çĕнтерÿçĕсене Хисеп грамотисемпе тата ятарлă парнесемпе чысларĕç. К.Мифтахутдинов, П.Краснов, В.Григорьев, В.Кузнецов, В.Беляев, О.Никифоров спонсорсем пулăшнипе мероприяти çÿллĕ шайра иртрĕ.