Публикации » Кашни уяр кунпа туллин усă кураççĕ

«Изамбаево» ял хуçалăх кооперативне çитсен чи малтанах йĕтеме кĕтĕмĕр. Кунта ĕç вĕресе тăрать тесен те йăнăш мар. Тырра алласа, сăвăрса çийĕнчех кĕлетсене кĕртеççĕ. Тепĕр çĕрте кун пек ĕçре ытларах хĕр арăмсене, хĕрсене куратăн. Кунта вара пурте ар çынсемччĕ. Владимир Николаев, Вячеслав Платонов, Петр Курицын, Анатолий Козлов ĕçре тăрăшуллă. Вячеслав Ивановпа Валерий Сапожников машинистсем тырă тасатакан техникăна лайăх ĕçлеттереççĕ. Андрей Кузнецов водитель алланă тырра турттарса тăрать.

Йĕтем çинчех хуçалăх председательне Николай Иванович Васильева тĕл пултăмăр. Вырма вăхăтĕнче ĕçченсемпе пĕрле вăл. Хăй руль умне ларса хирти комбайнсем патĕнчен çапса тĕшĕленĕ тырра турттарать. Ял хуçалăх кооперативĕн кăçал 260 гектар çинчен пĕрчĕллĕ тата пăрçа йышши тырăсем пуçтарса кĕртмелле. Владимир Андреевпа Евдоким Антонов комбайнерсем тухăçлă ĕçлеççĕ. «Пуçтарса илмелли нумай юлман»,— терĕ председатель августăн 24-мĕшĕнче. Хальхи вăхăт тĕлне вырма ĕçĕ вĕçленнĕ те ĕнтĕ.

Улăма çийĕнчех пресласа кĕртнĕ. Унта Андрей Крысов тăрăшать. Паян-ыран кĕр тыррисем акма çĕр хатĕрлесе пĕтереççĕ, акана тухма вăрлăх çителĕклĕ. Кĕçех кĕр тыррисем акма та тухаççĕ.

Пĕр сăмахпа каласан, хуçалăхра çуллахи кашни уяр кунпа туллин усă курма тăрăшаççĕ.

«Изамбаево» ял хуçалăх кооперативĕ уй-хир ĕçĕсене вăхăтра пурнăçласа пыни ертÿçĕрен те нумай килет. Н.И.Васильев хуçалăха аталантарас тесе тăрăшни ял хуçалăх кооперативĕн территорине пырса кĕрсенех курăнчĕ. Ертÿçĕ ĕçлекенсене мĕн май килнĕ таран хавхалантарса пыма тăрăшать.