Публикации » Нĕркеçсем спортпа туслă

Ку тăрăхра пурăнакансем паттăр ентешсене манăçа кăлармаççĕ. Акă иртнĕ эрнере Совет Союзĕн Геройĕ Г.Н.Чернов ячĕпе волейбол турнирĕ йĕркелерĕç. Кăçал вăл 18-мĕш хут иртрĕ.

Йăлана кĕнĕ турнира уçса спортсменсене, курма килнисене район администрацийĕн пуçлăхĕ Г.Ф.Волков, Хирти Сĕнтĕр ял поселенийĕн ертÿçи Г.Е.Ефремов, «Госсорткомиссия» ФПУ директорĕ Н.В.Иванов саламларĕç, ăнăçу сунчĕç.

Кăçал Нĕркеç вăтам шкулĕн спорт залне чи вăйлă командăсем пухăннă тесен те йăнăшмăп. Тĕрлĕ çулсенче Герой ячĕллĕ кубока тивĕçнисем вăй виçме килнĕ. Чи малтанах курнавăшсемпе (Елчĕк районĕ) вăрнарсем вăйă площадкине тухрĕç. Вăрнарсем хирĕç вылякансене 2:0 шутпа парăнтарчĕç. Нĕркеçсемпе елчĕксем хушшинче те хĕрÿ тупăшу пулчĕ. Виçĕ парти вылянă хыççăн çеç хуçасем хăнасене çĕнтерчĕç. Турнир пĕтĕмлетĕвĕсемпе нĕркеçсем мала тухрĕç, кубока тивĕçрĕç. В.Дмитриев, А.Ефремов, Н.Волков, Вячеслав, Лев, Владислав, Сергей Гладковсем пĕр-пĕрне ăнланса выляни командăна мала тухма май пачĕ. Вăрнарсем — иккĕмĕш, елчĕксем виççĕмĕш вырăнсене йышăнчĕç. Вячеслав Гладкова чи лайăх вылякан тесе палăртрĕç, вăл парнене тивĕç-рĕ.

Спортсменсене хаклă парнесем тата Хисеп хучĕсем парса чысларĕç. Ăмăртăва йĕркелесе ирттерме В.Беляев, В.Кузнецов, Хирти Сĕнтĕр ял поселенийĕ, «Госсорткомиссия» патшалăх учрежденийĕ спонсорла пулăшу панă. Нĕркеçсем хăйсен паттăр ентешне манманни пархатарлă.