Публикации » Пĕрлехи информаци кунĕ иртнĕ

Вырăнти ĕç тăвакан органсен, ял поселенийĕсен пуçлăхĕсен çуркуннехи тапхăрта ĕçĕсем татах хутшăнаççĕ. Вĕсен çурхи шывсене чипер ирттерсе ямалли, пушар хăрушлăхне вăйлатмалли мероприятисене йĕркелемелле, юр айĕнчен тухакан çÿп-çапа тасатма халăха хутăштармалла... Кусем çеç мар, пĕлтерĕшлĕ ытти ыйтусем татах та пур. Шăпах вĕсем çинчен калаçнă та Чăваш Енре, Комсомольски районĕнче мартăн 16-мĕшĕнче пулнă Пĕрлехи информаци кунĕнче. Çурхи ака-суха ĕçĕсене хатĕрленсе ирттересси, ял поселенийĕсен территорийĕсене тирпей-илем кÿресси, Чăваш Республикинчи ял хуçалăх пĕлтерĕшлĕ усă курман çĕрсене çаврăнăша кĕртесси – маларах асăннă тата çак темăсене сÿтсе явнă тĕл пулусенче.

Чăваш Республикин культура, наци ĕçĕсен, информаци политикин тата архив ĕçĕн министрĕ Роза Лизакова ертсе пыракан информушкăн чи малтанах район администрацийĕн пуçлăхĕпе Геннадий Волковпа тĕл пулнă.

Март уйăхĕнче ял поселенийĕсенче граждансен пухăвĕсем иртеççĕ. Çакна шута илсе Комсомольски район администрацийĕн пуçлăхĕпе Геннадий Волковпа Роза Лизакова министр Хирти Сĕнтĕр ял поселенине çитнĕ, унта пухăва хутшăнакан халăхпа тĕл пулнă. Çавăн пекех вĕсем ял çыннисене кăсăклантаракан ыйтусем çине те хуравланă. Хирти Сĕнтĕр ял поселени пуçлăхĕн Геннадий Ефремовăн отчетне итленĕ хыççăн ялти куллен-кун тĕл пулакан ыйтусене сÿтсе явнă: урамсене тирпей-илем кÿресси, шыв пăрăхĕ хурасси, çулсене вак чул сарса хытарасси тата ытти те.

Роза Лизакова Культура министерствин 2010 çулхи ĕçĕ-хĕлĕ тата 2011 çулхи задачисем çинчен каласа панă. Вăл палăртнă тăрăх, кăçалхи çул Чăваш Республикин Президенчĕн республикăра театр искусствине аталантармалли хушма мерăсем çинчен калакан указне пурнăçламалли тĕп тапхăр пулса тăрать. Кунсăр пуçне, республикăра пурăнакансем чăвашла программăсем питĕ курасшăн пулнине шута илсе хамăрăн наци телеканалне туса хурассипе тĕллевлĕ ĕçсем тăвĕç.

Ял поселенийĕнче пурăнакансене Роза Михайловна çурхи шывсене ирттерсе ярассипе мĕнле мероприятисем йĕркеленине каласа панă, ялсенче пушар хăрушлăхне сирес тĕллевпе тăвакан ĕçсене вăйлатмаллине аса илтернĕ, çурхи ака-суха ĕçĕсене хатĕрленес ыйтăва та çĕкленĕ. Ял çыннисем Пĕрлехи информкун темисене тата ытти ыйтусене сÿтсе явма хастар хутшăннă.

Чăваш Республикин Патшалăх Канашĕн депутачĕ, «Чувашрегионгаз» ООО генеральнăй директорĕ Кияметдин Мифтахутдиновпа ЧР Конкурентлă политика тата тарифсен патшалăх службин ертÿçин çумĕ Роза Лебедева Урмаел ял поселенийĕнчи культурăпа вĕрентÿ учрежденийĕсене çитсе курнă. Çавăн пекех вĕсем граждансене харпăр хăй ыйтăвĕсемпе йышăннă. Ял çыннисемпе ирттернĕ тĕл пулу ĕç тупса вырнаçас ыйту районта питĕ çивĕччине кăтартса панă.