Публикации » Сивве пăхмасăр – коньки çинче

Нĕркеç тăрăхĕ хăйĕн пултаруллă та маттур, ăста çыннисемпе чăннипех те мухтанать. Кунта çыравçăсем, ÿнерçĕсем, журналистсем, спортсменсем çитĕннĕ. Вĕсен хушшинче тĕнче шайĕнче палăрнисем те сахал мар. Нумайăшĕн ячĕпе ентешсем тĕрлĕ турнир йĕркелессине те йăлана кĕртнĕ. Кунта аслисем çеç мар, çамрăксем те хаваспах хутшăнаççĕ, вĕсенчен тĕслĕх илеççĕ.

Спорт ăмăртăвĕсенчи çитĕнÿсемпе те мухтанма пултараççĕ Нĕркеçпе Янкасси ялĕсенче пурăнакансем. Волейбол, шашка, футбол вăййисенче уйрăмах хастар вĕсем. Халĕ вара хоккей вăййине аталантарас енĕпе уйрăмах тимлеççĕ. Хăй вăхăтĕнче, 80-мĕш çулсенче, ку тăрăхри яшсем çак вăйăра районта чи маттуррисем пулнă. Иккĕмĕш çул ĕнтĕ Нĕркеçре хоккейла выляма ятарлă площадка пур. Кунта ватти-вĕтти те ярăнать. Аслисем çитĕнекен ăрăва хоккей вăййин вăрттăнлăхĕсене вĕрентеççĕ, хăйсен ăсталăхĕпе паллаштараççĕ. Çулсеренех пултаруллă хоккеист В.Воронов ячĕпе турнир ирттерни те çакнах çирĕплетет мар-и?

Кăçал вара пуçласа Хирти Сĕнтĕр ял поселенийĕн пуçлăхĕн Г.Ефремовăн кубокне çĕнсе илессишĕн хоккей турнирĕ йĕркелерĕç. Турнира район администрацийĕн пуçлăхĕ Г.Волков уçрĕ. «Хоккей çĕнĕрен вăй илни савăнтарать. Ку уйрăмах çамрăксемшĕн паха тесе шутлатăп. Кунта хăйсен ăсталăхĕпе паллаштарма пултаракансем чылайăн — А.Волков, П.Иванов, В.Максимов чăннипех те ăста. Çамрăксен вĕсенчен вĕренмеллех»,— терĕ вăл. Ял поселенийĕн пуçлăхĕ Г.Ефремов чи малтанах спортсменсене турнира хутшăнма кăмăл тунăшăн тав турĕ. Вĕсем шартлама сивве пăхмасăрах коньки çине тăнă-çке. Çак кун площадкăра икĕ команда вăй виçрĕ. Çамрăксем аслисене, ветерансене хирĕç вылярĕç. Ăстаçăсемпе выляма чăннипех те çăмăл мар, анчах та парăнасшăн пулмарĕç. Кунта чăн-чăн ăста спортсменсем çитĕннине çамрăксем тĕслĕхсемпе çирĕплетрĕç, хапхана пĕрре кăна мар шайба кĕртрĕç.

Вăйăра аслисем çĕнтерчĕç пулсассăн та ачасем пуçĕсене усмарĕç. Малашне хăйсен ăсталăхне ÿстермеллине, вĕренмеллине ăнланчĕç. Кубок ветерансене тивĕçрĕ. Турнир йĕркелÿçи Г.Ефремов спортсменсене Хисеп хучĕсемпе, парнесемпе чысларĕ. «Турнир çулсеренех вăй илсе пырасса, унта ытларах команда хутшăнасса шанас килет»,— терĕ Геннадий Егорович.