05 декабря 2007 г.
Аслă Çĕрпỹел ял поселенийĕнче ял библиотеки пĕрре анчах. Патшалăх пулăшăвĕпе, республика Президенчĕ витĕм кỹнипе, районти тата вырăнти влаçсем тăрăшнипе пирĕн библиотека та иртнĕ çул моделлĕ библиотека пулса тăчĕ. Унтанпа ĕç палăрмаллах улшăнчĕ. Хăтлăх хăй патнех туртать. Çавăнпа та шкул ачисем унтан тухма та пĕлмеççĕ. Вĕсем çеç мар, аслисем те тăтăшах пулаççĕ. Çĕнĕ кĕнекесемпе, куллен килекен хаçат-журналпа паллашаççĕ. Çакă савăнтарать, татах та ĕçлес хавхаланăва ỹстерет. Пирĕн вулакансем чылай. Акă, Елена Евграфова тивĕçлĕ канура. Апла пулин те эрнере пĕр хутчен те пулин хăйне интереслентерекен кĕнекене илме кĕрсе тухать. Николай Наумов диспетчер та - библиотека тусĕ. Вăл детективлă романсем вулама юратать. Мария Ивановнăпа Александр Васильевич Ильинсем иккĕшĕ те районти тĕп больницăра ĕçлеççĕ. Пушă вăхăчĕ сахал пулсан та кĕнекесемпе çывăх. Пур вулакана та асăнса пĕтереймĕн. Библиотека алăкĕ кун каçа уçăлса хупăнса кăна тăрать. Уншăн манăн кăмăл çĕкленỹллĕ. Çынсем пирĕн пата килеççĕ, апла пулсан вĕсен тавракурăмĕ ỹсет. Библиотекăра тĕрлĕрен мероприятисем ирттересси йăлана кĕнĕ. Пĕтĕм тĕнчери аннесен кунне халалласа "Ытарайми анне сăнарĕ" каç ирттертĕмĕр. Каярахпа аслă классемпе "Сăвă ярăмĕ чуна тыткăнлатăр" ятлă поэзи каçĕ пулчĕ. Пĕрремĕш тата иккĕмĕш классенче вĕренекенсем те пĕчĕкренех библиотекăпа туслашса ỹсеççĕ. Тĕрлĕрен вăйăсем вылятпăр, вĕсен пĕлĕвне ỹстерме тĕрлĕ ыйтусем çине хуравлаттаратпăр. "Юмах тĕнчине" те çитсе килтĕмĕр. Мероприятисем нумай йĕркелетпĕр. Унта ял халăхĕ хапăлласах хутшăнать.
Источник: "Каçал Ен"