25 октября 2007 г.
РФ Правительствин "Душа России" премийĕн лауреачĕсене палăртнă. Вĕсен йышĕнче Шупашкар хула администрацийĕн культура управленийĕ çумĕнчи "Уяв" фольклор ансамблĕн ертỹçи - Зинаида Козлова та пур. Ентешĕмĕр çак чыса 2007 çулта халăх пултарулăхне аталантарас ĕçре пысăк ỹсĕмсем тунăшăн тивĕçнĕ. Халăхра пурте пĕлекен "Уяв" ушкăн 1984 çулта Раççей культурăн тава тивĕçлĕ ĕçченĕ Зинаида Козлова пуçарĕвĕпе йĕркеленнĕ. Кĕске вăхăтрах вăл пысăк ỹсĕмсем тунă. "Уявра" тĕрлĕ професси çынни юрлать. Репертуарта - хăна, туй, улах, салтак, вăйă юррисем, такмаксем. З.Козлова тăван йăла-йĕркене упраса хăварас тата халăхра сарас енĕпе вăйне парса ĕçлеть. Репертуара пуянлатас тĕлĕшпе республикăри яллă вырăнсене çеç мар, Тутурстанпа Пушкăртстанри, Самар, Чĕмпĕр, Сарăту хутлăхĕсенчи йăхташăмăрсем патне экспедицисене тухса çỹреть, халăх юррисене çырса илет. Çак пысăк хисепе - 100 пин тенкĕ премие - чăннипех тивĕçлĕ ентешĕмĕр.
Источник: "Хыпар"