03 октября 2017 г.
Кăçалхи февральтен пуçласа сентябрь уйăхĕ-ччен Чăваш Енĕн Наци библиотеки профессионал мар авторсем хушшинче "Сăвăçсем - пирĕн хушăрах" республикăри конкурс ирттернĕ.
Асăннă акцие Ашшĕпе Амăшĕн çулталăкне халалланă, паллах, сăвăсен тĕп теми те атте-аннепе, çемье хаклăхĕсемпе, ăрусем хушшинчи хутшăнусемпе çыхăннă. Йĕркелỹçĕсен тĕп тĕллевĕ талантлă çĕнĕ авторсене тупса палăртасси, вĕсен чи лайăх сăввисене ятарлă сборникре пичетлесси пулнă.
Сентябрĕн 29-мĕшĕнче "Сăвăçсем - пирĕн хушăрах" сборнике презентациленĕ. Унта авторсем хăйсен хайлавĕсене вуланă. Çĕнтерỹçĕсен йышĕнче - Аслă Çĕрпỹел ял библиотекинчен кайнă Елена Акчурина та. Ăна Хисеп грамотипе тата хаклă парнесемпе чысларĕç, ял библиотекине вара республикăри конкурса хастар хутшăннăшăн Тав хучĕ пачĕç. Елена Акчуринан "Кичемлĕх", "Аннене" тата "Çук, тĕлĕк мар" хайлавĕсем виççĕшĕ те сăвăсен пуххине кĕнĕ. Пултаруллă автора çав ятпа саламлатпăр, творчествăра малашне те ỹсĕмсем сунатпăр. Сăмах май каласан, конкурса тĕрлĕ районтан 108 çын хутшăннă, 76-шĕ хăйсен сăввисене чăвашла, ыттисем вырăсла çырнă.
Елена Михайловна - Кĕçĕн Çĕрпỹел вăтам шкулĕн вĕрентекенĕ, аслă категориллĕ педагог. Вăл ачасене вырăс чĕлхипе литература предмечĕсемпе пĕлỹ парать. Çитĕнекен ăру тарăн пĕлỹ илтĕр, пурнăçра хăйĕн вырăнне тупма пултартăр тесе чунне парса тăрăшать вĕрентекен. Пушă вăхăтра вара умне шурă хут хурса сăвăсем шăрçалама юратать. Унăн чылай хайлавĕ "Каçал ен" хаçатра та пичетленнĕ. Нумай сăввипе юрă хывнă, хăшне-пĕрне Еленăн пиччĕшĕ, Александр Васильев юрăç, шăрантарать.
Чăннипех те, Турă панă пултарулăхлă çынсем хамăр хушăрах пурăнаççĕ, çулĕ яланах уçă пултăрччĕ вĕсен, чунĕнче хавхалану вĕретĕр.
Г.РОДИОНОВА,
библиотекарь
Источник: "Каçал Ен"