04 августа 2017 г.
Августăн 1-31-мĕшĕсенче республикăра "Трактор" профилактикăллă операци-уйăхлăх пырать. Ку операцие Шалти ĕçсен министерствипе Чăваш Енри Гостехнадзор пĕрле йĕркелеççĕ. Асăннă операцин тĕп тĕллевĕ - тракторсене тата хăй тĕллĕн çỹрекен машинăсемпе ытти техникăна, прицепсене хăрушсăрлăхпа тивĕçтересси. Тĕрĕслевсем иртнĕ вăхăтра регистрациленмен, тĕрĕслев витĕр кăларман юсавсăр техника хатĕрĕсем çине тимлĕх уйăрĕç тата кивелнине утилизацилеме сĕнĕç.
Районта тĕрлĕ маркăллă 1140 техника хатĕрĕ регистрациленĕ: агропромышленноç комплексĕнче 461 единица (40,5 процент), уйрăм çынсенче 627 техника (55 процент) тата промышленноç предприятийĕсемпе организацисенче - 52 (4,6 процент).
Агропромышленноç комплексĕнче пурĕ 227 трактор, вĕсенчен 195-ĕшĕ (86 процент) техосмотр витĕр тухнă. Комбайнсен 58 проценчĕ çеç техосмотр витĕр тухнă. Çак япала, паллах, комбайнерсем çитменнипе те çыхăннă.
Уйрăм çынсенче пурĕ 422 трактор, анчах та вĕсенчен 220-ĕшĕ çеç техникăна тĕрĕслев витĕр кăларнă. Уйăхлăх вăхăтĕнче çакăн çине гостехнадзор ĕçченĕсем пысăк тимлĕх уйăрĕç.
"Трактор" уйăхлăх вăхăтĕнче патшалăх техника тĕрĕслевĕн тата ÇÇХП инспекторĕсем ял тăрăхĕсенче рейдсем йĕркелĕç, техникăна тĕрĕслĕç.
С.КОКАРЕВ,
ЧР Патшалăх техника надзорĕн районти аслă инспектор
Источник: "Каçал Ен"