11 апреля 2017 г.
Эпир вăрçă пирки асатте-асаннесем каласа панă тăрăх тата архивсемпе кĕнекесем урлă анчах пĕлетпĕр. Шел пулин те, Аслă Отечественнăй вăрçă ветеранĕсем çулран-çул, кунран-кун сахаллансах пыраççĕ. Çĕнтерĕве çывхартма пулăшнисене патшалăх пур енлĕ те пулăшма тăрăшать. Çак çăмăллăхсенчен пĕри вăл - Раççей Президенчĕн 2008 çулхи майăн 7-мĕшĕнче йышăннă 714 номерлĕ Хушăвĕ.
Унпа килĕшỹллĕн, Аслă Отечествăлла вăрçă ветеранĕсемпе инваличĕсене тата унта хутшăннисен çемйисене çурт-йĕрпе çыхăннă ыйтусене татса пама пулăшни. Акă, Комсомольски район администрацийĕн пуçлăхĕ Алексей Самаркин иртнĕ эрнере салтак мăшăрĕсене сертификатсем парса хавхалантарчĕ. Федераллă бюджетран куçарнă нухрат вĕсене çĕнĕ те хăтлă çурт-йĕрлĕ пулма пулăшĕ. Асăннă сертификатпа усă курса ветерансен çемйисен Раççей Федерацийĕн кирек хăш вырăнĕнче те хăтлă хваттер илме юрать.
- Аслă Çĕрпỹел ял тăрăхĕнче кăçал Ефросиния Михайловна Карсаковăпа Елизавета Павловна Константинова салтак мăшăрĕсем çурт-йĕрлĕ пулма пулăшакан сертификата тивĕçрĕç. Унта палăртнă виçе 1137,384 пин тенкĕпе танлашать. Асăннă çынсем пирки калас пулсан, вĕсем иккĕшĕ те - ялти хисеплĕ те сумлă çынсем. Явраç аппа мăшăрĕпе 5 ачана пурнăç çулĕ çине кăларнă. Çемье пуçĕ колхозра агрономра ĕçленĕ. Елизавета Павловна 40 çул кĕçĕн çулхи ачасене пĕлỹ парас тесе ырми-канми тăрăшнă. Мăшăрĕпе, Петĕр тетепе, вĕсем 4 ача çитĕнтернĕ, - терĕ çак ял тăрăхĕн пуçлăхĕ Геннадий Ракчеев.
Кăçал çакăн евĕр сертификата пирĕн районта тата тепĕр икĕ çемье тивĕçнĕ. Вĕсем - Урмаел ял тăрăхĕнчен.
Çурт-йĕрпе тивĕçтерекен субсиди ватăсемшĕн Çĕнтерỹ кунĕ умĕн кĕтмен ырă та тивĕçлĕ парне пулчĕ. Алексей Самаркин тав сăмахĕ каласа сертификат панă май кашнинех çирĕп сывлăхпа вăрăм ĕмĕр сунчĕ.
А.ИСАЕВА
Источник: "Каçал Ен"