19 сентября 2015 г.
Çĕршывра рынок системи хуçаланма пуçласан суту-илỹ тата та вăйлă аталанчĕ. Уйрăм çынсем тĕрлĕ лавкка-киосксем уçрĕç. Юлашки темиçе çул хушшинче унччен пысăк хуласенче çеç пулнă сетьсен магазинĕсем те çитрĕç пирĕн пата. Çак пулăмсем пурнăçа тĕрлĕ кăткăслăхсем кĕртрĕç пулин те, Комсомольски райповĕ хăйĕн аталану çул-йĕрĕнчен пăрăнма шутламасть те. Ялсенчи магазинсен çурчĕсене, обществăллă апатлану пункчĕсене çĕнетет, пурлăхпа техника никĕсне çирĕплетет, сутуçăсем валли хăтлă условисем туса парать, тавар ассортиментне анлăлатать тата ытти те.
Акă, иртнĕ эрнере Хирти Шăхасанти магазинăн çĕнетнĕ çуртне уçни те çỹлерех каланă сăмахсенех çирĕплетет. Ял çыннисем, лавккара ĕçлекенсем хăйсен савăнăçне пытараймарĕç, Комсомольски райпо ертỹлĕхне чĕререн тухакан тав сăмахĕсем каларĕç. Магазин заведующийĕ Эльвира Быкова кун пек лайăх условисенче тата та тăрăшарах ĕçлеме хавхалану çуралнине пĕлтерчĕ. Прилавок умĕнче тăракансене тата тавар туянакансене райпо совечĕн тата правленийĕн председателĕсем Е.Карпеевпа Л.Сорокина, тĕп бухгалтерĕ С.Кокорева, Аслă Çĕрпỹел ял тăрăхĕн пуçлăхĕ Г.Ракчеев, суту-илỹ ветеранĕ З.Андреева ăшшăн саламларĕç, ырлăх-сывлăх, ăнăçу сунчĕç. Культура ĕçченĕсем вара юрă-ташăпах саламларĕç.
Ш.Ахметов бригади магазин çуртне тултан та, шалтан та çĕнĕ сăн кỹнĕ. Халь кунта самообслуживани меслечĕпе тăрăшаççĕ. Санузел та, ăшă-сивĕ шыв та пур. Ĕçле те ĕçле, плана куллен тултарса пыр. Райпо правленийĕ çывăх вăхăтра Хирти Шăхасан ялĕнчи магазин ĕçне автоматизацилессине те ĕç планне кĕртнĕ.
- Паянхи куна пирĕн райпо тытăмĕнчи 12 суту-илỹ точкине автоматизациленĕ. Ĕçе çак йĕрке çине куçарни мĕнле тавар ытларах кайнине сăнама, хăш япала пуррипе çуккине е миçе юлнине пĕлме май парать. Сутуçăсен туянакансен ыйтăвне тивĕçтерме вăхăт сахалрах каять. Малашне заявка парассине те çак система урлах йĕркелесшĕн. Капла сутуçăсене отчет тума та çăмăлланать, - пĕлтерчĕ райпо правленийĕн председателĕ Людмила Сорокина.
Çапла, пурнăç малалла аталаннăçемĕн кашни сферăнах çĕнĕ варкăш вĕрсе кĕртет. Пирĕн районти кооператорсем вара пурнăçпа тан пыма хăнăхнă. Чăвашпотребсоюз утса тухнă 95 çулта пухăннă опыт, ĕç меслечĕсем, квалификациллĕ кадрсем туптани комсомольскисене малашне те çитĕнỹллĕ ĕçлеме май паратех тесе çирĕп шанас килет.
Л.ШУРЯШКИНА
Источник: "Каçал Ен"