Публикации » Асра тытма тивĕçлĕ

«Каçал ен» хаçатăн пĕр номерĕнче «Красный Октябрь» колхоз председателĕнче нумай çул ĕçленĕ В.А.Арсентьев çинчен çырнăччĕ. Манăн та хамăн пурнăçри унпа çыхăннă самантсем çинчен çырса кăтартас кăмăл пур.

Василий Афанасьевича пирĕн районтан СССР Аслă Совечĕн депутачĕ (1984 çулхи март уйăхĕнчен) пулма суйланăччĕ. Вăл вăхăтра çав шайри депутат районшăн тата республикăшăн нумай ĕç тума пултарнă. Район пурнăçĕшĕн пысăк пĕлтерĕшлĕ икĕ пулăма В.А.Арсентьев депутат тÿрремĕнех хутшăннине асăнса хăварас килет.

Пĕри — район больницине туса пĕтерсе ĕçе кĕртесси. Ку енĕпе чылай чăрмав пулнă. Вĕсенчен пĕрне манăн, райĕçтăвком председателĕн социаллă ыйтусемпе тата строительство енĕпе ĕçлекен çумĕ пулнă май, Василий Афанасьевичпа пĕрле татса пама тиврĕ.

Больницăран тухакан каяшсене сиенсĕрлетекен сооруженисене туса пĕтерме, çав шывсене федераллă çул айĕнчен пăрăх тăрăх хăвалама ятарлă пысăк пусăмлă насус кирлĕ пулчĕ, унсăрăн патшалăх комиссийĕ больницăна йышăнмасть. Çав ЦМК-16-27 насуса Молдави Республикин тĕп хулинчи Кишиневри пĕр çар завочĕ кăна кăларать. Пур тавара та вăл вăхăтра Госснаб системи урлă анчах илме май пулнă. 150 килограмм таякан насуса Кишиневран мĕнле илсе килмелле-ха?

Ун чухне çул çÿрекен халăх йышлă пулнă. СССР Аслă Совет депутачĕсем вара пур транспортпа та черетсĕр тата тÿлевсĕр çÿреме, хăйсемпе пĕрле пĕрер пулăшакана та илме пултарнă. Çапла вара эпир 1984 çулхи июль пуçламăшĕнче В.А.Арсентьевпа пĕрле ирех Кишинева тухса кайрăмăр. Пире пур çĕрте те тараватлăн кĕтсе илчĕç. «Гидромаш» заводăн директорне шăнкăравласан та пĕр сăмахсăрах тĕл пулма килĕшрĕ. Тепĕр кун вăл тÿрех пире валли çав насуса уйăрма хушу кăларчĕ. Виçĕ кунран насус района хăй вырăнне çитрĕ те.

В.А.Арсентьев депутат район шайĕнче тунă тепĕр паллă ĕç — хăна çуртне тума пулăшни. Аслăраххисем ас тăваççĕ пулĕ, пирĕн район центрĕнче вăл вăхăтра лайăх хăна çурчĕ çукчĕ. Тĕллев: çĕнĕ хăна çурчĕ тумалла. Анчах ун чухне строительствăна çулталăк планне кĕртме те, укçи-тенкине тупма та йывăрччĕ. Стройка валли колхозсене çеç çителĕклĕ укçа уйăратчĕç. Çавăнпа та çак хăна çуртне пĕр-пĕр колхозри выльăх пăхакансен çурчĕ тесе тума шутларăмăр. Ку, паллах, районшăн ырă ĕç тăвас тесе кăштах «улталани» пулать. Пĕр хуçалăх ертÿçи те çакна хăй çине илме хăрарĕ — Василий Афанасьевич çеç (тен, депутат пулнипе те) килĕшрĕ. Вара çак хăна çуртне колхозри стройка ячĕпе тума пуçларăмăр. Ĕçсем малалла кайнă май, укçи те тупăнчĕ, çав шутра Чăвашпотребсоюз пулăшнипе те. Çапла хăна çуртĕнче кафепе кĕнеке лавкки те уçăлчĕ.

Иртнĕ ĕмĕрĕн 80-мĕш çулĕсен вĕçĕнче пурнăç арпашса кайрĕ пулсан та, В.А.Арсентьев депутат çак курăмлă икĕ ĕçсĕр пуçне хăйĕн колхозĕнче тата районта чылай ырă ĕç туса хăварма пултарчĕ, çавăншăн ăна эпир асра тытма тивĕçлĕ.