Публикации » Ĕç ветеранĕ

Аслă Çĕрпÿел ял поселенийĕнче пурăнакансенчен чылайăшĕ патшалăхăн пысăк наградисене тивĕçнĕ. Вĕсенчен пĕри — Кĕçĕн Çĕрпÿелĕнче пурăнакан А.М. Ефимова. Анна Максимовна ĕçри ÿсĕмсемшĕн, тăрăшулăхшăн Ленин орденĕн кавалерĕ ята тивĕçнĕ.

Вăл 1938 çулхи нарăс уйăхĕн 20-мĕшĕнче çуралнă. Ачалăхĕ, вăрçă çулĕсене лекнĕ май, çăмăл килмен. Ашшĕ Тăван çĕр-шывăн Аслă Аттелĕх вăрçине тухса кайнă та унтан таврăнман. Анна аппа ашшĕне ас тумасть, амăшĕн аллинчен тухса ÿкнĕ «хура хут» çеç паянхи кун та хăрушă тĕлĕк пек асрах.

Ялти шкулта 7 класс пĕтернĕ хыççăн çамрăк хĕр сысна фермине ĕçлеме каять. Кăштахран вара укçа-тенкĕ ĕçлесе илес тесе Анна аппа çамрăксемпе пĕрле Оренбург облаçне торф кăларнă çĕре çул тытать. «Йывăр ĕçре çăмăл килмен. Кунне-çĕрне пĕлмесĕр тăрăшнă. Укçа-тенкĕ ĕçлесе илес тенĕ çав», — тет хĕрарăм иртнине аса илсе. Тăван енрен инçе пурăнма хăнăхман хĕр каялла ялах таврăнать, колхозра ĕçе кÿлĕнет.

— Мухтанмасăр калаçатăп, эпир ĕçленĕ вăхăтра «Красный Октябрь» колхоз районта çеç мар, республикăра та малтисен ретĕнче пулнă. Çакă ĕçченсен тăрăшулăхĕнчен те, ертÿçĕрен те нумай килнĕ. Тĕслĕхрен, В.А. Арсентьев хуçалăха 30 çул ытла ăнăçлă ертсе пынă. Пĕрле ĕçленĕ юлташсем те яланах маттурччĕ. Акă, М.И.Григорьева Ĕçлĕх Хĕрлĕ Ялав орденне илме тивĕç пулчĕ. Çавăн пекех Е.П.Наумова, М.П.Ядрова, Н.А.Молокова, М.В.Филиппова ĕçтешсене те Тав хучĕсемпе, хаклă парнесемпе чысланă, — аса илет ĕç ветеранĕ.

40 çул ырми-канми фермăра тăрăшнă Анна Максимовна ĕçне партипе Правительство пысăк хак панă. Темиçе хутчен те вăл район, республика шайĕнче «Чи лайăх сысна пăхакан» ята çĕнсе илме пултарнă. 1970 çулта хĕрарăма «Ĕçре палăрнăшăн» медальпе, тепĕр çулах Ĕçлĕх Хĕрлĕ Ялав орденĕпе наградăланă. 1976 çулта «Ĕçри паттăрлăхшăн. В.И.Ленин çуралнăранпа 100 çул çитнĕ ятпа» юбилей медалĕпе чысланă. Тав хучĕсем, Хисеп грамотисем те нумай ветеранăн.

«75 çул... Нумай та мар, сахал та мар. Вĕсенчен 50 çулĕ — çемье çавăрса, шанчăклă мăшăрпа пĕр-пĕрне ăнланса пурнăç сукмакĕпе утнă çулсем. Мăшăрăмпа, Петр Васильевичпа, пилĕк ача çуратса пурнăç çулĕ çине кăлартăмăр», — аса илет Анна Максимовна. Ачисене тĕрĕс-тĕкел ÿстерсе тивĕçлĕ воспитани пама тăрăшнă. Вĕсем, ÿссе çитсе ашшĕ-амăшĕн килĕнчен саланнă пулин те, тăван кĕтесе манмаççĕ. Ачисем, мăнукĕсем пухăнсан Ефимовсем чунтан савăнаççĕ. Çакă мар-и вăл чăн-чăн çемье телейĕ;